DBCF MEIFAR

November 2010

Editor Cafung

Rundamtu Naute Suahcam...

* Ziangtin kan hmuak ding?

* Zu le sa nom-ceenak in maw?

* Hnipuan thar in maw?

* Thlacamnak in maw?

Kan thinlung timtuah thlang pei uh!

* * * 

THLARAU THIANGHLIM

Rev. Nehemiah Sui Nei Piang (DBCF)

Thlarau Thianghlim Co Daan phun (5)

I. Pentecost ni ih Jesuh Dungthluntu pawl Thlarau thiang hlim co daan. Jerusalem ah minung 120 rual in van ihsin Thlarau Thinghlim thleng ding cu an hngak ih hih 120 lak khalah Dungthluntu pahnih khal an tel ve (Act.1:8). Hi pawl hi van ihsin Thlarau Thianghlim direct ih cotu pawl an si. John 14:16-17 sungah Thlarau cu thlangamtu a siih kumkhua ih kan hnen um ding a si. Pentecost ni ihsin thawk Thlarau thianghlim in leilungtlun zumtu pawl a um cilh hai a si. Cule Meisa lei vek cu an zate parah a rung fu. Judah ruah daan ahcun meisa cun thil pahnih a hmuh sak. (1) Kholhfainak le (2) Pathian um pitnak a siih Israel pawl ramcar ih Meisa-ding khal in Pathian umpitnak a rak hmuh sak.

II. Judah pawl co daan (Act.2:38)

 Sualsirnak le Jesuh Khrih hmin in Thlarau Thianghlim an co a si.

III. Samaria khua pawl co daan. (Act.  8:14-17)

 Piter le Johan in an lu parah an kut an suang ih Thlarau Thianghlim an co.

IV. Ephesa khua pawl ih codan. (Act. 19:1-7)

 Jesuh hmin in Baptisma an lak hnu ah Paul in an lu parah a kut a suang ih Thlarau thinghlim an co.

V. Zential pawl codan. (Act.10:44)

 Piter thusim ngai ih a zumtu hmuah hmuah in Thlarau Thianghlim an co. Tu san kannih khal Jesuh Khrih rundamnak theifiang ih kan pianthar veten Thlarau Thianghlim kan co a si (Efisa 1:13).

II. THLARAU THIANGHLIM KHATTU PAWL NUN DAAN

Bezael cu Thlarau Thianghlim ih a khat veten Biakbuk hrang ih a tulmi pawl tuah a thiam (Exo.31:3-5, 35:31). Othenial cu Thlarau Thianghlim in khat ih ram-uk a thiam. Judg. 3:10-11. Samson cu Thlarau thianghlim in a khat ih a cak. Judg. 14:5-6, 15:14. John cu a nui’ Pumsung a umlai ihsin Thlarau Thing hlim in a khat (Lk.1:15).   

Elizabeth cu Thlarau Thianghlim in a khat ih Mary ih dinhmun a theihpi (Lk. 1:41). Paul cu Thlarau Thianghlim in a khat ih Elimas mit a cawter (Act.13:9-11). Zumtu hmaisa pawl cu Tharau Thianghlim in an khat ih ralthazet in thu an sim (Act.4:31).

Efisa 5:18 ah Thlarau Thianghlim khat dingin in fial. Thlarau Thianghlim hi leitlun minung hrangih a thupibik mi a si. Sual thu khalah Thlarau Thianghlim theihter ngaingai lo cun ka sual a si ti kan thei ngaingai lo. Rundam kan si ti theih fiangnak khalah Thlarau Thianghlim theihternak ngaingai lo cun um zia kan nei thei lo. Christian nun khalah Thlarau nun tel lo cun um zia nei lo kan si. Kawhhran khal Thlarau Thianghlim kaih hruainak lo cun kan member mipi pawl hi Hremhmun sangkaa ih hruaitu si a awlte. Curuangah Thlarau mi ih hnatuannak le tisami mi piangthar pawl ih danglamnak malte kan zoh ta pei.

Thlarau mi: (a) Pathian lam thil a ngaina (Rm.8:5), (b) Pathian lungawi zawng an hawl. (Gal.1:10),  (c) An hnatuan mi ah Pathian hnenah sunloihnak an pe (IIKor.12:6; IKor 10:3)  (d) Thiltha a tuah mi ah Pathian a thangthat. (Phil.1:9-10;4:3)

Tisa mi: (a) Leitlun thil ah an ngai na (Rm.8:5), (b) Minung lungawi zawng an hawl (John 12:43). (c) An thiltuah mi ah minung lawm an beisei (John 12:42). (d) Thiltha a tuahmi ah a thei ring ring ih a hminsin (Luke 18:9).  

Malakhi 3:16, Lei thlun ih Pathain hrang kan hnatuan mi hmuah hmuah cu amah Pathian in a cabu sungah in khumsak a si.

* * *

* * * 

Santhar Israel din daan.

Part II. 

Theodor Herzl ih Thu 

(1860-1904)

Dr. Run Bik

Kum 1800 hrawng tiang ih Israel ram um daan kan ngan zo ih, tu cu santhar Israel dintu pa Theodor Herzl (1860-1904) ih thu ka run ngan ding. Ani hi Hungary khawpi Budapet khua ah 1860 ah a suak. A nu le a pa khal mi nung thei an siih. Juda mi ti aw fekfek an si na’n sakhualam ngaihsak lemlo an si. Herzl hi ca a thiam thei zet ih, 1878 ah Vienna University ihsin Ph.D a ngah. Cuih hnu ah France ram Paris khawpi ah thuthangca ih thuthang latu hna a tuan. Tawkfang tiang cu Herzl hin a miphun thuhla lam a ruat tuk lemlo. A thinlung a thlengtu cu 1894 kum France ram ih thil thlng ihsin a si.

France Army ih Captain hnatuan France Juda mi Alfred Drufus cu midang pawl in ram phatsantu ah an puh ta riai. Thuthatei’ a ruattu pawl cun hihi thu dik lo a si ti an thei na’n Dreyfus hi Juda mi a si ruangah reipi tiang cu acozah le court lam khal in thiam lo an can ter. Heilaifang ah France khawpi tampi ah mi tampi cu zinzawh in Juda mi pawl thi hai seh tiin an au phah vek a theih tikah Herzl cun Juda mi pawl hin mai’ ram ti thei dingmi ram an neih lo cun an him dah lo ding ti a thei. Himi hnu cun Herzl hin Juda mi pawl hrangih ram neih theinak ding lawnglawng a ruat thlang. Herzl hin 1896 ah The Jews State ti ca uk a ngan ih, Zionist Novel Old New Land ti’n 1902 ah a ngan. Herzl hlan ah Juda mi pawl hrangah ram neihter ding titu pawl an rak um ko nan an rak hlawhtling dah lo. Cumi pawl  lakih hmin thang pakhat cu Hebat Zion ti hi a siih, annih hin lo neih phah ih Juda mi pawl hrang ram din an rak tum.

Herzl cun World Zionist Organization a din ih, amah cu President ah a tang. First Zionist Congress cu Switzerland ram Basel khua ah 1897 ah an tuah. Amah khal cu khual a tlawng ciam co i, Jerusalem tla a pal. Cule a ram thar din dingah khati lai ih Palestine ram neitu Ottaman Empire ih sultan tla Istanbul ah a tong. German siangpahrang Kaiser William II tla a tong. Tha an rak pe lem lo. Amah rak bomtu bik cu leh hnu ih British Prime Minister rung tuantu Joseph Chamberlain a siih anih cun British pawl ih Africa an ukmi Uganda ram ah Juda ram tuah sehla tiin thu ron a pe. Juda ram hrangah Cyprus tikulh le Sinai ram tla an zoh. Herzl cun Uganda ram i ram thar rak tuah lawk cu a duh nan an hotu pawl in an duh lo. Curuangah 6th Congress ah Uganda cu ruat nawn lo siseh tiin an ti.

Herzl hi a tummi hrangah hna a tuan tam tuk curuangah a harhdamnak khal in a tuar ih, kum note, 44 lawng a si lai ah Pneumonia natnak in Vienna ah 1904 ah a thi. A ruhro hi 1936 ah Jerusalaem ah an la ih, Independence an neih hnu 1949 ah Jerusalem ih Mount Herzl ti hmin an sakmi ah thlaan hnget si dingin an phum ta. Herzl hi The Father of Modern Zionism an ti theu. Israel ram thar dintu ah a cang na’n Juda sakhua cu cutluk in a thupi ter lo...

* * *

Kan cung i thil a thlengmi hi 

kanmah ruangah maw Amahte in? 

(Gen 1:31, Salm 24:1)

Pastor Peng Thawng (LCC Asst. Pastor)

A hmaisabik ah “Kancung i thil a thleng mi hi kanmah ruangah maw, amahte in?” ti mi vun tial khawhnak caan akan petu kan Pathian leh DBCF Meifar tuanvo hngeitu dihlak sinah lawmhnak tumpi ka nei. Cun atawi khawhnakte in ka vun langhter lai i;- 

Minungnih nitin kan ton mi thil hi an ni khat cio hna lo i, acheu nih ngeih chiatnak kantong i, acheu nih lung-lawmhnak kan tong. kan tonmi thil hi anni khah khawh dih lo ca ah, zei ruangah dah a si ti cu chim khawh a si lo. Sertu Pathian lawngnih a theihmi thil a si, titu in kan tonmi thil hi ruat hna u sih ti hi Pathian bia nih akan cawnpiak mi cu a si. Minung nih hrial khawh lo in kan tawn mi thil cu “Vanthatnak le Van- chiatnak”, hi an si. Vanthatnak kan timi cu zeidah a si i, Vanchiatnak kan timi hi tah zeidah a si ve? A luan ciami kum 2004 i Indonesia ram le a pawng kam ram hna; Lil a hninh ahkhan minung tingthum leng an thi i, cun 2005 ah India ram le Pakistan ram ah Lil a hnin than i Thawng sawnli hrawng an thi thaan. Cun 2008 ah Kawlram ah “Nagis” thlichia a hrang thaan i Tingkhat lengthi thaan, Mah Lil-hninh ruangah le Thlichia a hraan ruangah a thimi hna hi an van a chiat caah maw a si hnga? Cun mah Lil-hninhnak chung in le Thlichia chung hin a luatmi an um hnga maw? Zeiruangah dah an thih? Zeiruangah dah an luat hnga? Ruah ding tampi kan nei. Nang zeiti’n dah na ruah ve?

“Secular and Super-natural” timi ca-uk tialtu pa F.R. Barry nih cun “Vanthatnak kan timi hi harnak a tong rih lo mi hna cate lawng hi a si,” a ti. F.R. Barry nih cun harnak cu nikhatkhat ahcun an tong ve hrimhrim lai a ti fawn. Cun Religion in Africa timi cabu tialtu pa G. Parrinder nih cun, “Vanthatnak hi minung kan ni ralrinnak chung in le kan tuahsernak chungin a chuakmi thil a si,” a ti ve. A langhter mi cu Pathian nih miung hi a kan ser tikah ruahkhawhnak fimnak le hmuhkhawhnak, theihkhawnak thluak a kan pek a ti. Cu a hmang thiam mi hna ca ahcun vanthatnak an ngei i, a hmangthiam lo mi hna ca ahcun vanchiatnak an hmu khun tiah a ti ve.

The Primal Vision timi cabu a tialtu pa J.V. Taylor nih cun vanchiatnak kan timi hi cu “Pathian laksawng pakhat” a si a ti. A chim duhmi cu vanchiatnak um hlah seh law vanthatnak a um hnga lo, vanthatnak Pathian nih langhter a duh caah vanchiatnak hi a umter tiah a chim. Cun vanchiatnak a um lo ahcun Pathian sermi thil hi a tlamtling hnga lo a ti. African Religions and Phylosophy timi cabu a tialtu pa Herbert Jai Singh nih cun vanchiatnak hi “Kanmah minak ni hna caah Pathian nih a ser rua tiah PiPu hna nih an rak ruah tawn” tiah a ti. A langhter thaanmi cu kanmah minak mihna ca lawng si lo in sermi minung dihlak ca thu a rak si tiah a langhter lengmang thaan.

Vanthatnak ah le vanchiatnak ah keimah ka tonmi thil vun langter ka duh. Mizoram le Kawlram ramri Tuidang khua ah mission rian kan tuan i, cu Tuidang khua cun Lawngtlai lei ah ka rak tlung. Kan tlun lei ahcun kan mawtaw lam thlang ah a tla i, kan hawipa pakhat a thi. Kei cu ka van a tha ka ti i Pathian sin ah lawmhnak bia ka chim. Asina in a thimi kan hawipa ca ahcun vanchiatnak a si. Rak thi ve ning law ka chungkhar nih kan van a chia an ti va hnga. Mah kan tonmi thil ah kan tonmi thil cu an nikhat ko na in kei ka nung i, anih cu a thi. Zeiruangah dah kei ka thih lo i anih a thih ti hi khua voitampi ka ruat lengmang. Asina in ka tlinh lonak a sullam le kan hawipa a thihnak a chan ka hngal kho lo. (Phungchim.3:11) ahcun zeizong vialte hi anmah le an caante a serpiak cio hna ti kan hmuh.

Vanchiatnak le vanthatnak hi Genesis 1 chungah Pathian bia nih fiangte in a kan hmuh sak bantuk in Pathian nih a tha tiah thlachuahnak a pekmi thil an si ti hi a pom daan thiam hna u si law hmailei kan kal lai mi kan lam tluan ah fim a kan chimtu thil a si lai. Pathian nih chia-tha thleidan khawhnak fimnak a kan pekmi hi a hman zia thiam hna usilaw kan lam a tluanglai i thlachuahnak zawng tam deuh kan hmu hna lai. “Pathian i bochanhnak ah luatnak a um i, a nawlbia zulhnak ah thlachuahnak a um” tiah Pathian bia a um bantukin nitin kan nunnak ah kan tuah dingmi kan rian hi philh hna hlah usih.

Cu caah kan cung i thil a thlengmi hi “Kanmah ruang ah a si kho i, amahte zawngin a si kho.” Hmuh khawh lo mi thil chungin a chuakmi an si caah, nitin kan nunnak ah i ralringte in nun thiam kan herh. Hmuh khawh lo mi thil pahnih cungah a kal cuahmahmi kan si caah lamhruaitu Jesuh Khrih kannunnak ah Bawi si ko seh... Ca reltu nan dihlak cungah thlachuahnak um ko seh.... Amen

Hmuh daan ...

By: Rev. Daneil Kap Thuan Thang

(Living Faith Baptist Church, New Delhi)

Himi nan thulu tarmi thuthawn mal te run nganve sehla, “Kan parih thil thlengmi hi kanmai’ ruangah khal a si lo ih amahten a thleng ve hrimhrim khal a si lo. A thlentertu Pathian ruangah a si sawn. Pathian siannak lo le remtinak tel lo in thilzianghman hi a mahten a thleng thei lo. Pathian cu ziangkim tlun ih Thuneitu a si.”... Ka lung a awi.

By: Hau Lian (Atlanta... ex.. DBCF)

Nan thulu tarmi keimai’ theihnak si lo in Kan Baibal sung vekin ...“Kan parih thil thlengmi pawl hi, asia atha in kan Pathian hmin sunlawinak dingih Pathian in a thlenter mi an si.” John 9:3  a bung 9 pum in siar thluh sehla, suahthlak ihsin mitcawpa thu ah nan thulu hi a fiang theh in ka thei... ka lungawi.

By: William Sui:  

...“Kanmah ruangah a thlengmi khal a um, a mahten a thleng mi khal a um thotho ko. Pakhat khat te’n simfiang cu a har deuh men ding.” 

Ca siartu nangteh ziangtin na ruat?

***

Lilawn Hnuai ih Thinglamtah 

Pu Thang Dum

Sagaing lilawn thar cu 2005 kum ah an theh. Sagaing lilawn saklam deuh ah a thar donmi a si. Kalaymyo, Tahaan (Kalay) veng nupinu hnenah hitin thuthang a dong. “Sagaing lilawn thar on puai tuah ni hlan tengteng lilawn tangah Thinglamtah (Cross) va phun aw?” timi thusuak a si. Kei cu nunau ka si ih hlei ah Sumpai nei lo, Kawl tong hman thiam lo ka si. Ziangti’n  so cuvek cu ka tuah thei ding” ka ti tikah, “Nang ih sumpai neih le Kawl tong thiam a tul lo; Kawl tong thiam le sumpai liamtu ding cu na hnenah ka ratter dingih anmah pawl thawn na feh ve ding” i ti.

Lilawn phuanpuai an tuah hlanah Thinglamtah ra phun lo asile nan ram cu hivekin a si ding i tiih hmunrawn kaupi ah phuk rulpi a cuangih thli in a suk a so ah a hran ciammam, cuih rulpi cu an kuur luihlo in ka hmu. Cross na phun ngahsuak asile nan ram cu hivekin a si ding i tiih kawh-tawng lung vek hlir cu hmun rawn kaupi ah a cuang lala ih, par tim tuah zik hlum liailiai lak ahcun, malte partimtuah ih par zo malte te an um ka hmu. Asinan a sullam cu zianghman ka thei cuang lo. Kawl tong thiam ih sumpai liamtu ding cu kan inn ah a r ngaingai ih a feh ding thuhla kan ruat tikah; phmunpi lam le lam hla feh ding kan  si ruangah mawtaw tha deuh hawl kan tum. Asinan thla kan camnak ih thu thleng pakhat cu nan fehnak ding cu Haimual mawtaw Driver cu ricin a si ding” i ti. Mawtaw kan sut ih a remcang ko nan Driver thuthu a siih Driver pa sut hnik uh in rak ti; Driver pa kan va tong ih a rak mawng cu ci lai nan; feh dingah in lungkim pi. Driver thawn kan zaten mi pa(8) kan si. Kalaymyo ihsin kan poksuak ih Sagaing cu tluangten kan thleng.

Lilawn thar thlen zik ah ralkap pawl in in rak check nan zianghman kan ken lo ruangah Lilawn kiangtiang kan feh. Thinglamtah (cross) kan kenmi cu Lilawn thuai tidai tai tiang hrawngah; ka tha neih tawk suah in ka nam pil hnu ah; pacang pawlin lungtum in an khenbet ih hngetzet maw tiin thlacamnak kan neih hnu ah ti kan bual ih kan bual-awk thluh hnu ah tlun zin kan zawh saal. Kan Thinglamtah phurmi cu thal caan a siih minung tibual le survorh tivek ih an ton ih an siat suah pang dah ti lo cun, a um ringring ding a zum um ko.

***

Daw Aung San Suu Kyi netabik thu le innsang 

November 13, 2010, (Sat) ah kan duhdawt mi kan Nu bik Aung San Suu Kyi cu kum 7 Inn-thawnginn a taannak ihsin suah zalen a si zo. Culawng si loin A fapa nauta sawn Kim Aris(kum-33) thawn an suah hnu a ni 10 nak November 23, Yangon Airport ah damten an tong-aw. A fapa hi kandung lam kum 10 lai ih a hmuh netabik ta mi a si. 1991 ih Nobel Prize laksawng ngahtu Pi Suu Kyi hi 1989 ah a hmaisabik kai thok hai in, hiti lai ah a fapa nauta tu Kim hi kum 11 mi te lawng a siih, a upa tu Alexander khal kum 16 ih upa lawng a si lai. Himi hnu kandung lam kum 21 sungah Pi Suu Kyi hi kum 15 sung rori innthawng ah an thlak hai. Cule a pasal Michael Aris hi cancer natnak ruangah 1999 (kum-53) ah a thisan. A thihhlan ah a nupi a tong duhzet nan Kawlram uktu pawl in kum  3 sung Visa an pek duh lo. Suu Kyi hin tu le 2 a neih zo nan tu tiang a hmu dah hrih lo. Thlacamnak thawn hmailam kekarnak ding hrangah kan bawm cio pei.

***

Tedim ah Bus Accident mi 17 thi

Friday, 26 November 2010

Laitlang Tedim khuapi, Cope Memorial Baptist Church (CMBC) Biakinn pi ah Zo Calai  an thoknak kum 100 kim Jubilee Puaipi (Nov. 26-28) an nei. An zate mipi zate 10000 lenglo an siih mikhual 8000 lai an kim. Cuih puai zawh dingin Tonzaang Khuapi ihsin Chin-Taung-Taan Bus ah mi 80 lai an to. Vansiat thlaktak in Tedim thlenhlan peng 10, Zalui  an thlen, Bus a feh cakzet ruangah zinkawinak ah lamzin naal deuh thawn a control thei nawn lo ih zinthlang kham pi 100 saang ah a khawhsuk aw. (Nov.26, sundir 12:00 ah a si.). Mi(12) cu a hmun ah an thi hngalh ih mi(5) cu Zato an thlen hnu ah an thi. Driver cu tutiang an hmu hrih lo. Bus cu a siatzam thluh, mi 30 lai cu hliamma besiazet an tuar ih Tedim Zato ah an zingbawl rero lai. Himdamte ih luat tla an um. Bus neitu hi Tahaan ih um U Cin Pu a si. Thlacamnak thawn kan bawm cio pei. 

Hram: Zogampost uudate News

Malaysia ih mithat thu November 21, 2010

Malaysia ram, Johor khua ah Tlangval (Kawl) in a fala nu (Kawl) a that. A falanu (kawlnu) paisa a dil ringring. Rm. 4,500/-  tluk lai a dil zo. “Paisa i pek lo le ka lo that ding” a ti theu. A vuak, a thawi, a hrem theu. Tlangvalpa hi mi huatsuak, zu-in, suamhmang a si, fala dang tla a nei. Paisa a dil ringring thotho. Thu an el-aw ih ''Ka lo duh ngaingai lo, ka lo duh bum men'' a ti. “Hnaihnok men na si thlang, ka lo hai nawn lo'' a tiih a fala hmaisa cu a that lawlaw. A ruak cu hnawmpen kiang ah a ret ta men. Tuksumza a si..

* Laimi fala pawl ralring cio uh. Kawl tlangval pawl cu mi-ngiar an paih tuk. Mi duh-bum an thiam tuk. Veikhat an ngah hnu cun, “Hnaihnok'' men in, an tiih, hnawmhne vekah an ruat men. Kawl zate cun an si lo nan, A tamsawn cu an si ko. Fala tlangval pawl in fimkhur a tul. Kan san hi san sia a si tihi hngilh hrimhrim hla. Thinlung hnakin neihnak hi a tlangpi in zoh a si zo..    hrm: Rihli

Aizawl (Mizoram) ah Sumu Accident

Zokhawthar (Tio) ihsin Aizawl ih khualtlawng Sumu cu Nov. 27,4:00 am, Durtlang (Aizawl) zinthlang ah a tla ih Pu Zir Lian(driver&owner) cu a hmun ah a thi cih ih passenger pa(2) cu Aizawl Zato ah an thi. Passenger(8) lam cu hliamma thawn Zato ah an zingbawl rero lai a si. Thlacamnak thawn kan bawm cio pei.        ... Editor

Thuthan

Thlacamnak: 

Pastor le Evant pawl innsang tin ah vehvai phah in thlacam saknak (November 22-24) an nei. 

Combine Meeting:

Nov.20,(Sat) ah Kawahhran a cak vivo theinak dingah le a liam cia cangvaihnak pawl thlirsaalnak le relkhawm- nak Combine Meeting kan nei ih mipum 35 lai kan kim thei. 

Innkhaan kauh: DBCF Biakinn sung cu inn neitu ih siannak vekin a sungih khaan hran cu kauhbet a si zo. Pathian in rem a ti ahcun inntlun tla

Crusade:

December zarh thumnak ihsin Crusade nei ding kan si. Thlacamnak thawn tan kan lak cio pei.

General Meeting:

Nov.28, 2010 (Sun) zingkhawm theh ah DBCF member zate General Meeting a um ding. 

Bupi Sumlut:

September thlasung sumpai cazin 1/10 - Rs. 77158/-, le Thawhlawm ah Rs.3660/-. Kan lungawi Petu zate parah Pathian in thlua- suah pe hram seh.

Mmber thar:

October thla sung member thar mipum(2) an kan nei. DBCF hi thluasuah ngahnak hmun ah cangter hram seh. 

Nau thar:

September thla sung Pathian laksawng nau thar kan Pastor ih ap sakmi pa(4) an kim. Kan lungawipi zet ih Pathian in lamhruai vivo hram seh. 

Ramleng in fehsan:

DBCF ih kum reipi sung pumpetu kan rinsan mi Pa Cung Bawi Hup innsang cu Nov. 15. 2010, USA ah in fehsan zo a si. Pathian in an tuah an thamnak ah thluasuahnak pe hram seh. 

Seminar: 

Nov.5, (Friday) Mino Department ih tawlrel mi  Seminar, Pastor Peng Thawng (LCC Asst. Pastor) parah siseh, 

“Leadership Training”: Nov 8-9, nihnih sung Pastor Johny le Evan Lal Lian Bik hohanak in kan nei thei. 

Youth Excurssion:

Dec.1(Wed), ah DBCFY Excurssion, Delhi khaw sung kan pal dah lonak hmun pawl ah kan feh ding. Mi pakhat ah Rs.50/-bur ding a si. Unau pahnih tlun cu pakhat free a si ding. Christmas Present Exchange a um ding ruangah packing tuah in ken fingfing ding a si. Mah le veng ih Mino E.C pawl hnenah theiter le paisa pek a a theih. Nov. 28 (Sun) netabik hmin pek theih a si. 

Carol Singing:

Christmas Carol Singing cu December 16-17 le 20-21 zaanli sung vak ding. Choir zir phah in Carol singing hrang ah hla kan zir thok zo. 

Nauhak Khawsung len:

Sunday School tlawngta pawl Dec.4, (Sat) ah khawsung lengnak a um ding.

***

DBCF Meifar

October, 2010

Mi beidong Zakia

Zakia cu milian le sinak sangzet nei mi asinan mi ih hmuh thei lo mi 

a  sunglam nun ah beidonnak in a khat.  A sinak le a neihnak pawl in nun colhhahdamnak an pe thei lo. Asinan cuih a nun beidonnak cun theipi kung parah kai in Jesuh a cuanter. Jesuh in “Zakia, zamrangin rung tum aw, tuihsun na inn ah ka tlung ding,” tiah a ti. (Luke 19:5). Nun bei dong ih a hnen pantu pawl  hnenah an tul mi tuahsak theutu cu kan Pathian a si. Zakia vekin sinak sang  le milian si cingih  nunbei dong thup tampi an um. A sinan Zakia vekin Jesuh hnenah an pan duh lo. 

Kan Bawipa Jesuh hnenih thum-awk ngaingai ding cu an pam hmai aw tuk. Milian hminthang  pakhat cu a riahnak Chicago hotel  dot(9)nak ihsin a dop ih a thi. “Minung daan ahcun dollar (mak ta duai 10) ka nei nan thinlung le thlarau lam ah kei tlukih mi farah an um lo ding. Dam rei  hi ka hrangah thathnemnak a um lo” ti’n ca a ngan ta. Nun hi Krih a tel lo ahcun sullam zianghman a nei lo. Jesuh neitu nang le kei  hi  leitlun ah mi vanthabik kan si. Kan Pathian hmin thangthat in um seh!

Leitlun ralpi pahnihnak hrawngah Australia ram khawte  pakhat ah Peter J. Daniels timi nauhak pa te a um. A dam thei  dah lo ih mi tawltiangti te a si. A tlawngkai pi pawlin an zawmtaizet ih  capohnak le kutthak rawtnak ah an hmang men.  An tlawng Sayama Miss Phillip in “Ziang hrang khalih tangkainak nei lo ding pa” a ti theu. Bank Manager pakhat in “hi pa hi cu a dam sungah inn le lo khal a nei dah lo ding” a ti ve. Culawng si lo veikhat cu an ramhruaitu upa pakhat khalin “hi pa in mi lak ah thu a sim ngam dah lo ding” a ti. Mi in an nautattuk ruangah tlawng khal a kai paih nawn lo ih khaw lak ah nun beidong in  a vaktawi zok rero men. Rit theih mi a phunphun tham in a cancan le lamzin kiangah tla a it men theu.

       

Veikhat cu Sydney  khuapi ah Billy Graham in crusade a nei ih cunah Pathian thu a ngai ve. Cuih tum ah piantharnak a co. Bawi Jesuh a neih ngah ruangah a thlarau nun lawng si lo in a leitlun nunkhal ah thluasuah tampi a dong. Pathian fa a si zia a theifiang ih a hlan ih an nautatnak tongkam hmuahhmuah cu pakhat hman a dikmi a um lo, netabik ahcun Australia ramah multi–millionaire hminthang le lei tlunpi ih theihmi mi thupi ah a cang .  Mi tahnak ih tling lo, hringtu nu le pa tahnak hman ih tling lo, mi  beidong le santlai lo pawl khal hi Jesuh an neih ngah ahcun mi thupi le mi pakhat ah an cang saal thei a si. Mi beidong  pawl hnenah nun lungawinak thar semter sal theutu kan Bawipa  Jesuh hmin thangthat  in um seh! 

* * *

Chilli ram Sui khurpi A cim             

Hram: CNN

Leitlun pumpi in a ngaih venzet mi le an helhkampi zetmi Chili ram ih sui le lung mankhung dang dang pawl laihnak a cim. 

August 5, 2010 ah Chilli  ram ih suikhur lai pawl minung 33 cu an sui khur a cim ih leilung sung ih pi 2500’ sungah an taang. Nungdam ih an um nawn pei maw, hiti ih minung, nunglai rori leihnuai thukpi sungih phun an si hi cu ziangtluk thinharza a si! Lei lungpi in a theih tikah a tuar thei ve lo. Ni tawkfang hnu ah Pathian cutcak in an taksa/thinlung le thlarau rundam saal.  Ziangtluk lungawiza! Hih an luatnak thu a theitu hmuah hmuah cu lungawi theh a si.  Kan ni hman kan lungawi cun an nufa le an rampi cu ziang tluk an lungawi ding, an Lungawi nak mithli a luang. 

  An luatnak thu an theih le veten ziangzat a cem khal le poi lo ti in,  runhimnak hrang -ah Chille Cozah cun  ram dangdang thiamnak le bomnak dilin Rundamnak hnatuan an thok. Cutin lungkua laihnak dingih cet tha bikbik an hawl ih, minung 33 ih umnak zawn ah minung tlem in sun le zaan ti lo in, kua an lai. Cumi sung hmuahhmuah cu kua dang fate pakhat a um ih cumi in telephone le hman-bi-lu in, an zuk an zoh aw, An bia aw. Ti le rawl an vun pe. Ni 69 a rei hnu ah an umnak lungkua sung an vung thleng. An lungawi daan cu a mak tuk. An nufa pawl khal an tap. Chili suikhur laitu hnatuantu pawl khal an mitthli a tla. An lungawi tuk.

Mipi sung ihsin Manuel Gonzalez timi pa in leihnuai ih tum ih run suak dingin a pum a pe, cutin minung pakhat lawng to theimi thirkuang an tuah a vung tum. Leihnuai a thleng ih pakhat hnu pakhat kha cuih thirkuang sungah an to ih an  suah. Cuti’n minung 33 cu leilung parah an hung thleng thei. An laksuah hmaisa bik Florencio Avalos leng a hungthlen veten a sungkhat le an ram President, Sebastian Pinera in lungawi mithli thawn an rak hmuak. An lakah ramdang mi umsun Bolivia rammi Carlos Mamani tla a tel. An lakih kum nauhak bik Jimmy Sanchez a si. An zate nazi pakhat dan in an laksuak thluh thei.

Company le acozah pi cun an run suahnak hrangah $ 20 millions an cem.   Ziangtluk ram uktu in a rammi a duh dawt ti cu a lang. Nang le kei tla uktu/hotu/hruaitu kan si cio ding, kan kuttang pawl parah ziangtluk in kan duhdawt?

Lei lung par ih an thlen hnu khalah ni 69 sung Ni tleu hmu lo ih an um ruangah, tleunak an hmuh asile, an mit in a tuar thei lo pang ding tiah, $ 400 man mikherh dum an kharhter ih, an thlen vete in siizung ah a harhdamnak tla an check sak cih. Ni li sung siizung ih an um hnu ah, inn ah an tlunter saal. Curuangah, an lung a awizet ih, Chili ram hrangah pacang tha hung si dingin an tum cio a si. Nang le kei teh?

* * *

Israel Ram Thar an Din Daan

Dr. Run Bik

Kan Baibal sungih a ngan vekin Israel mi pawl cu Pathian thu ih an um lo ruangah a hmaisa ah Israel ram(Saklam ram) cu BC7 00 hrawng ah Asiria pawl in an lak ih, cuih hnu BC 500 hrawngah Jerusalem telnak Juda ram cu Babylon pawl in an lak leh. Himi hnu cun Jesuh Krih suah tiang kum malte sunglai lawng Israel pawl cu mah te uk-awknak an nei ih, a tam sawn cu ram dang kut hnuai lawnglawng ah an um. Kan Bawipa Jesuh Krih ih a rak sim cia vekin Jerusalem cu na siat nasa ding a ti vekin AD 70 ah Juda mi pawl ih thate ih an um lo ruangah Rome emperor lal bik cun a fapa Titus Hovin ralkap thawngsawm tampi Juda ram ah a thlah ih, Jerusalem khal cu a bal thluh ih, mi khal thawng tampi an that. Tamzet in an ram an tlansan.

Himi hnu ah an ram cu Rome hnuai thotho ah an um ih, a tangmi pawl in AD 140 ah an hel leh. Rome cun zangfahnak malte hman nei lo in mipi cu a hrem ciam co, an nung um sun pawl khalin an ram an suah san thluh ti theih a si. AD 330 hrawng ih Rome lal Constantine  cu Christian a can tikah mi tampi cun Rome pawl ih Juda Palestine ram ti ih an kawh mi ah khual va tlawng in Jesuh umnak pawl an va zoh theu.

AD 636  ah Arab Muslim pawl in ram thianghlim cu an lak ih hi ram cu Muslim ram ah an tuah. AD 1200 hnu ah Europe ih crusade tuahtu Christian ralkap pawl in kum 150 lai an uk. Cule Arab a si lo nan Muslim a si mi Seujuk, Maamluk pawl tla in an run uk, a netabik ah Muslim tho tho Ottoman Turk pawl in kum 400 lai an run uk. AD 636 ihsin kum 1300 sung hrawngah a tam sawn cu Muslim pawl in Israel ram hi an run uk. Israel Thuanthu a peh... Kum AD1800 ihsin cun Juda mi pawlin leitlun ram dangdang ihsin “kan ram ah kir saal uhsi!” ti politic an run tuah. Juda mi pawl ih an ram an suahsan thluh hnu kum 1700 sung lai ah Palestine ah Juda mi pawl hi malte tal an tang nawn ke maw aw ti hi tuhlan ah rak theih duh mi bik pakhat a si ih, cumi thu ah veikhat cu ziangtiklai khal ih Palestine ih Juda mi 5000 tal an um ringring thu an ngan.

(Suak leh ah: Theodo Hertz hovi Israel i vaih ding Zionism politic an feh pi daan ) 

Hminsin: Himi Israel thuanthu hi pe vivo lai dingmi a si.

* * *

MINO NA SI RUANGAH ZOHMAN IN 

LO NAUTAT HLAH SEH

(ITimote 4:11-12)

 Seh, seh ti mi voi(7) a hmang. Seh, seh ti cu si teng teng seh tinak, cang tengteng seh tinak a si.

A hmaisabik ih ka sim duhmi cu Pathian pakhat a um ih, Pathian le minung karlak ah remnak palai pakhat, minung Khrih Jesuh a um. Khrih a zumtu hmuahhmuah cu kum khua nunnak kan nei. (Jn.3:16). Mino kan siar daan hi kum 40 ih thuailam hi a si theu. "Mino na sinak hi zo hman in lo nautat hlah hai seh" a ti. Ziangruangah mino mi in in nautat?

Mino hi Pathian thu  ah (34)vekin kan pial aw, dung a tun aw, a kalhaw a si. Mino tampi nunau mipa ti um loin zu le sa, zuk le hmuam ah kan thlahdah aw tuk ruangah mi ih nautat kan tong. Kan Baibal in le lo nautat hlah hai seh, a ti. Kan nun daan hi vun ruah a cu so khaw... mino! 

“... Tong ah siseh, a ti lala. Duhduh tong, mi relsia dutdo aw nu/pa au kio ruri, puar thau emem in kan nung. Mino vun ruat tha saal aw. Kan tong daan hi! “... um tlandaan ah siseh” a ti lala, ti bualbo ih vak, mi ih mitkem za ih vaktam, zaangzel, hnatuan paih lo in kan um.

...duhdawtnak ah siseh, a ti lala. Ziangkim ah mi famkim si awm takin mi zaang fahnak cang thiam lo in inn hnen duhdawt hnakin

Page...4/clm..3.. ah a peh 

Mino na si ruangah .... peh..

huat tum sawn mai, unau hnakin mi duhdawt sawn, nu/pa cu kan Baibal in duhdawtnak ah a ti si. Mino vun zoh tha saal hnik. “...Thlarau ah siseh,” a ti lala. Thlarau lam khal ih than ti um lo, mah kel ih than hnak ih fer deuhdeuh, mi dang thlarau ih an lungawi, thang that hla an sak khal le rak riahsia ringring, ...“thlarau ah siseh, Zumnak ah siseh, a ti lala. Mi dang zumnak ah ke kar in an thannso rero lai ah zianghman ih rak sawt cuang lo, kei cu ti ringring, Mino thaten ruat aw. 

“...Thianhlimnak ah siseh,” a ti. Mino pianthar veten Pathian hrangah an tiih an ser thianghlim aw aw. Asinan mi phundang/vai lakah mumal lozet, duhduh in kan nung ih miphun/hnam le unau nu le pa hminsia ko tuahtu ah kan cang. Mino zumtu pawl ih zohthim dingin nung sawn ding kan si. Zohthimnak hnakin mi tlutertu ah kan rak cang. Mi piangthar lo pawl hman nangmah le keimah in zoh ruangah piangthar duh lo khawpin an um. Suakthuan, no lai, caakhiarnak pawl khal tlansan awla, thinlung thiang ih Bawipa a kotu pawl thawn dingfelnak, zumnak, duhdawtnak, hnangamnak man dingin dawi sawn aw. Aat-thlak le sullam nei lo thusutnak pawl cun buainak a suahter ti na theih ruangah cu pawl cu hrial thiam aw. 

Cun, Bawipai’ siah hlawh cun mi elbuai ding a si lo. Nunneem le thinsau tangdornak nei sawn ding kan si. Mino, taansan a tulmi taan uhsi! Hlon a tulmi hlon uhsi! Khiah a tulmi khiak uhsi! In duhdawttu Khrih Jesuh ih palai si maw? Kan raalpa Setan ih palai si na duh? atu ah vun hril hnik aw. Mino, na no lai ah Pa Pathian in hman a lo duh. Nun thar hruh uhsi! Khrih ih raalkap tha si tum uhsi! Tongkam ah siseh, umtlan daan ah siseh, duhdawtnak ah siseh, Thlarau ah siseh, zumnak ah siseh, thianhlimnak ah siseh, zumtu dang pawl ih zohthim ding in kan nung thlang sawn pei uh!  

        ........Bikte,Zawlte

* * *

KA DING THEI LO

  

Ka in, ka ei, ka nuam-aw tuk ka ti aw, asinan ka in tamtuk ruangah ka rii ih ka ding thei nawn lo. Nom caan cu rei lo te hrang lawng. Ka kiangkap ka zoh ih bawmtu ding hawl in thotu nei lo in ka tha neihtawk ka suah, ka tha a cemtuk ruangah ka tho thei nawn lo. Hitin maw ka nun- nak a cem ding tin khua ka ruat.

Ka nun khawsak daan ka thleng thlang ding, ka ke in ka ding thlang ding, ti’n khua ka ruat, asinan cuih caan ahcun ka thil sual tuah ruangah ka ruahnak a tha nawn lo, ka tha kel khal ka ken nawn lo, ka caantha ei le innak lawngih ka hman kha aw tin lungsir in ka um.

Ka hman zo mi caan pawl a poi ti in thin a naa, kan caantha neih mi ka hman thiam lo ruangih a poi kan ti ahcun a thahnem nawn si lo, caan in le in hngak lo, zumtu unau kan caantha neihmi hi ziangtin kan hmang? Kan zohfel saal pei uh! Kan ti thei tawkin Pathian hrangah tuan kan zuam thlang pei.

Kan dinhmun zoh saal in leitlun ei hawlnak khalah sungkua fimthiamnak le thazaang ring lo in kan thazaang, kan fimnak in kan ke ih din thei hi kan zuam kei uh, kan tuahtuannak hlawh tling dingin Pathian hnenah kan rinnak kan thum pei uh, kan hriamnaam thabik thlacamnak dai thlang lo te’n duhdawt mi zumtu unau.

                 by.. salai nanglekei

* * * 

Samarimi Mitha

Delhi ih um hnatuan mipawl cun kan hngakhlap  emem niih a zum umbikmi Ni cu hnatuan kan cawlh ni, Nipi Ni (Sunday) a si a rin um. Zingdang ai-in Nipini zing ni suak a mawi cuang tla a bang. Pathian lamhruainak in Tlawngkai nikhat in Zarhteni thleng tluangten hna kan tuan thei ih a thaizing biakinn ih Pathian thangthat khawm ding cu kan cak cio ko ding. Tumkhat Nipi Ni cu kan rualpi pawl thawn khawm dingin kan feh, khawm baan vete an rual(zawng) ah inn tlung hngal loin ni a sat phah thawn ka rualpa  pakhat thawn C-1 ah kan leng ta. Tlailam ni a neem in kan venglam pan in kan pok. C1 bus cawlhhmun in rickshaw hmang dingin kan um, vansiat thlak takin hman ding a rak um ta lo ruangah thunuam rel phah in kan ke thawn feh phah in rickshaw cu kan sut phah vivo.

C-1 ihsin G1 park bus cawlhhmun kan thlenzik zawng ah kan hmai ih platform zinnkap parah mi pakhat it kan hei hmu. Ka thinlugte cun “tuvek nisa le riva lak ih cu pa cu zuu a ri a si na hlam” tin ka ruat. A kiang kan thleng cun vawn zoh hliah na khawh zuri si loin zing dangih lamzin sirih to ka hmuh theu mi hmulhmui le khabehmul sau hliamhliam, bawngbi le angki pawp seksek putar kut dawh thi zik a rak ril a si, a kiang khalah zohman an feh paih lo. A thi zo maw tin kan zoh saal tikah a mit a pual thluh zo, asinan a hnuk cu  a cat hrih lo hmang. Ka rualpa thawn cun kan thin a nuam lozet ruangah thu khal kan rel peh bet thei nawn lo. Rickshaw hman ding kan hmu ih kan feh phah ah kan hei hawi kirsal nan tuamhlawmtu a nei cuang lo.

Hi mi rethei zawnzai, zaangfahza, thih lawng hngakih um pawl hin an thih hlan tengteng ah anmah duhdawttu an nei a si ti thei in hnangamte’n um ta man hai sehla ka duh. Curuangah annih pawl hi hnaihnawk nawn lo hram hram uhla ka va duh ve aw! A tul a si ahcun keimah sawn hi in that mai uh; annih pawl thinphannak ding hi cu tuah lo hramhram hnik uh, thah tlak le hnaihnok tlak an si lo hi! ti’n farah rethei zaangfah ih au phah rero cingin 1997 Sep 5 ni ih Calcutta khawpi ih an vui liam zomi mifarah mangbang vansang pawl ih nu ti’n an kawhmi amah khal samaria mi mitha thinlung a putu Mother Teresa ngai a va um tak em.

 Aw... Mother Teresa, mangbang vansang a tongtu pawl in an lo au rero nan na nunnak in adaih nawn si lo. India ram ah nang bang thinlung a putu an um nawn lo maw si! 

Kan kiangkap ah bawm tul tampi an um si. Nang (Kawhhran, fellowship le bulpak)le kei tuanvo a si lo maw si? Ram dang mi kan si ruangah maw tuan loin kan um men ding? Pathian in Mother Teresa bangin  nang le kei Delhi in thlengter a si lo ti’n kan ti thei pei maw? Zumtu cu kan thlennakkip ah a rawngbawl ding kan sisi. Mi tampi in Pathian duhdawtnak thei loin le rilrawng ti haal in thlaanmual an liam si. A mawh kan  phur ngam pei maw? Aw ...mifarah mangbang bawmtu ding Samarimi mitha kan va lo tul tak em....

By. C.Deirel

* * *

Milai Nun Caan tawite

Milai kan nun caan tawite sungah a liam ciami thil ruangah thinhar ih um ring ring hi a ralai dingmi lungawi -nak hlohternak a si. 

Na ti theizat tiangin mithmai pante’n um thei ding kha zuam hnik aw, na theih lo sungah lungawinak in a lo thlun cih ding. 

Na tuah sual pang asile ngai dam dil ding kha ningzak hlah, ngaidam na dil tam poh le remawknak na tuah 

tam a si mai.

Tuah danglam a ngah nawn lomi, na thin lo tibuaitertu kha taanta mai aw, ziangahtile thiltha dang na tuahnak ding caan a lo tlaitertu men a si.

Na thinlung sung murilbik ah midang hrang thathnemnak ding kha ruat ringring awla, midang duhdawt theitu le ngaidam theitu zohthimtlak nunmawi a par suak ding.                      

by: Puite 

* * * 

Delhi Commonwealth Games 2010

By : Dr. Run Bik

Commonwealth Games a suah daan hi hitin a si. Kum 1930 lai kha Britian ih leitlun then 4 then i thenkhat a rak uklai ah himi games hi British Commonwealth Games tiin Canada ih Hamilton khua ah an rak nei. 1947 khan India cu independence a ngah ih, asinan Britian thawn pehzawmawk an neih ruangah British ti kha hlawn in Commonwealth an run ti, cumi hnu ah Commonwealth Summit ti le Commonwealth Games ti hi a rung suaknak a si. Kum 2014 ah Common-wealth Games hi Scothland (UK) ram khawpi Glasgow ah an nei ding. Kum 2006 ah Australia, Melbourn ah an rak nei.  

Kum 4 i vawi 1 neih theu mi Common-wealth Games cu India ram khawpi, New Delhi ah United Kingdom ram ih siangpahrang bawinu Elizebeth ih fapa Prince Charles in a ong. A onnak hmun hi mi 60,000 tlemnak Jewaharlal Nehru stadium ah a si. A onnak hi India President Phrabati Patil in a bom. India hin hi lehawknak hi thleng dingin kum 2003 ihsin khan a rak pom cia. Himi games ahhin team 71 an tel thei asinan a ram zawng cun ram 62 lai an si. Hitivek ruangah a si. Thuthimnak ah United Kingdom ram cu ram pakhat lawng an si na’n team 4 in an tel. Cucu England, Scothland, Wales le Northern Ireland ti in an si. Himi ruangah tuihtum games ahhin fiangzet ih No.2 si ding kha No.3 an si phah. Himi thu cu kan ngan leh ding.

India in himi games a rak laklai 2003 ahkhan Rupees million 7000 lai lawng cem dingah a rak ring na’n an tuah taktak tikah Rs. Million 350000 an cem ta riai. Himi hi kum 7 sungih thil man a kaituk ruangah a si na’n a dang leh cu thil tuah ding an run neih tam ruang khalah a si. Cuih tlun ah a poizet mi cu sum ei-ruknak (corruption) ruangah tla si. A poi nasa. Hihi tuih hnu games an run theh hnu ah an run zingzawi aw ih India ram hrangah a ningzah thlakzet. Games hi an thokhlan ah India cun medal 100 la in a pahnihnak kan la ding an ti ih, an ti vekin a run si cekci. A tawp ah India cun Gold 38, Silver 27 le Bronze 36, Total 101 a hmu. A tir ihsin Australia cu a rak ngam lo cia.

Leknak ih an Medal an ngahmi pawl

Country    Gold   Silver  Bronze  Total

AUSTRALIA 74 55 48 177

INDIA 38 27 36 101

ENGLAND 37 59 46 142

CANADA 26 17 32 75

S.AFRICA 12 11 10 33

KENYA 12 11 9 32

MALAYSIA 12 10 13 35

SINGAPORE 11 11 9 31

NIGERIA 11 10 14 35

Himi kan zoh tikah  England cun total medal ah 142 a ngah nan medal total i 101 ngah India a hleihnak cu Gold Medal hi India ih pakhat a ngah tam deuh ruangah a si. India i gold medal a ngah netabik cu badminton ah leitlun nunau i thiam bik Saina Nehwal ih Malaysia nu Mew Choo Wong cu women single badminton final ih a neh ruangah a si.  Cule United Kingdom ih tel Scotland cun Gold 6 a hmu ih, Wales cun gold 1 a hmu ve. An zate kom sisehla cu India an hleih nasa.

United Kingdom timi ah England, Scothland, Wales le Northern Ireland an tel ih Great Britian an ti cun England, Scothland le Wales pawl hi an si ding. Olympic khalah annih ram cu team 4 in an tel thei. World Cup Football khalah team 4 in an tel thei. An van nei hleice kan ti ke maw an then-awk ruangih an si ding vek ih an si lo hi an van sia kan ti ke maw...

India i gold a rak ngah tamnak hi meithal kah le buanawk i gold 20 lai an ngah ruangah a si. Tuihtum cu hockey khalah India an thleng sangzet. Final ah Australia thawn an lek aw ih, Australia lak ahcun 7-1 in a cak ta lo. 2008 Beijing Olympic ahkhan cun India hockey team hi olympic ih tel ban ram 16 hman ah an tel thei lo a si. Tuih November thla ah China ram Guangzhou khawpi ah Asian Games an nei ding. India hi hitawk ah medal 60 tal an ngah thei ahcun a vanneizet ding ti a si. Asian Games ahcun China, Japan le Korea ram pahnih pawl an tel ding ruangah Asian Games hi Commonwealth Games hnakin sang ih ruah a si. 2010 CWG cu October 15 ni ah sunglaizet in a theh suak thei.                         

* * * 

Kawlram Thantar (flag) thleng

Kawlram ralkap mi-uk cun mipi zalennak ding hrang lampi an feh ti lanter awknak ding hrangah thantar thar cu October 21, tlawngkai nili ihsin hmangthok dingin an puangzarh. Hi thantar thar hi Kawlram sml 3:00 tlm* cekci ah thlengnak caanserh cu ralkap bawi pawl in an hmang. Thlengnak caanserh an hman rual in rampum huap ih phunzarhnak neih ding mi cu hmang lo in hi caanserh an hman hlan te ah rampi zuknung in thannak an rak nei cia.                      

* * * 

Kawhhran sung thuthan

Thlacamnak:

Pastor le Evant pawl innsang tin ah thlacam saknak le thlua- suah peknak Oct.28 ah siseh,  Oct. 1-2, Kawhhran pi cikcim thlacamnak siseh, Deacon pawl Member tin vehphah in innsang tinah thlacam saknak October 18-19 ah siseh, Mino Thlahnih veikhat Rawl-ul thlacam Oct. 9, siseh, Mino E.C pawl innsangtin thlacam saknak Oct.13-14, siseh kan nei a si. Thlacam poktu zate parah Pathian in thluasuah pe hram seh. November thlathar ni 5-6 ah Cikcin thlacamnak a um ding.

Baptistma peknak:

Kawhhran sung ihsin Bawi Jesuh Khrih ih rundamnak a cotu Baptistma co hrih lo pawl cu Oct. 10, 2010(Sun) DBCF Biakinn sungah  kan Pastor Rev. Sui Nei Piang in a pek ih mipum(9) le nauhak Crusade ih Rundamnak a fiangtu tampi sung ihsin mipum(16) tla Crusade theh ni Oct.,15, Kan Biakinn pi tho tho ah Baptistma pek an si.

Bupi Sumlut:

September thlasung sumpai cazin 1/10 - Rs. 75,622/-, Mission hrang Rs. 4,820/- le Thawhlawm ah Rs.2,845/-. Petu zate parah Pathian in thluasuah pe hram seh.

Member thar:

September thlasung member thar lutmi zate mipum 24 an si. Pathian in DBCF hi an thluasuah ngahnak hmunpi ah cangter hram seh. 

Nau thar: 

September thla sung Pathian laksawng nau thar kan Pastor ih ap sakmi cu  Pa Benjamin le Nu Tial San Mawi te ih Fapa te Simon Cung Lian Bik a siih Pathian in thluasuah pe vivo hram seh. 

Mino Choir:

Zarhtin Tlawng -kai ni li le ni nga, Biakinnpi ah Mino pawl Choir zirnak a um ringring. Rickshow fare le Refreshmen bupi in an tum ringring. 

Seminar:

A ralai dingmi Nov. 5, 2010(Friday) Dewali zungpit Ni ah Mino hmin in Seminar kan nei ding a si. Ropizet in neihtum a si.  Zinglam 10:00 ihsin zaanlam 3:30 tiang si ding. Lunch thawzet buatsaih a si. Zozo khal ra pok cio le tel cio ding kan lo sawm. Kawh- hran dangdang tla sawm theh an si. 

Youth Excurssion:

Sweet December, December 1, ah DBCFY Excurssion a um ding. Delhi khaw sung kan feh ding. Mi pakht ah Rs.50/-bur ding a si. Unau pahnih tlun cu pakhat free a si ding. Mah le veng ih Mino E.C pawl hnenah theiter le sumbur a si ding. 

Carol Singing:

Christmas Carol Singing cu December 16-17 le 20-21 zaanli sung vak ding. Carol singing hrangah hlazirnak cu Church Choir kan zir tinten zircih a si ding. Hlazirnak cu November thla tawp lam ihsin kan thok leh ding.

Sunday School Crusade:

DBCF Nubu ih hohanak in Nauhak Crusade 11-15, Oct, 2010 kar khat sung Rev. Sui Nei Piang le Pu Hram Lian Bik hmang in ‘Rundamnak le Nun daan Mawi’ thupi zirnak kan nei. Nauhak mipum 120 lenglo an kim thei rinring ih khaanhnih in then a  si. Kawh- hran dang dang ihsin tla nauhak tampi in telpi thei ih kan lungawizet. Zirh bawm tu SS zirhtu zate siseh, Nubu E.C pawl siseh, In le ei tawlrel saktu zate parah siseh, thlacam saktu zate le crusade sung Budella veng ihsin nubu thlacam group pawl parah siseh, ram leng ihsin sum le pai in kuattu: Nu Biak Kung innsang, Salai Za Zung, Peter Zar Zo Sangte innsang, Nu San Vang innsang le Nu Van Lal Mawi te innsang parah kan lungawizet. Pathian in thluasuahnak pe cio hngai hram seh. 

DBCF MEIFAR

September, 2010

Editorial:

Biakinn ih Pathian Biak khawm dingin phuahhlam na hawl dah ve maw? Pathian in tikcu caan le boruak in pek ih khua a hlumtuk le dai deuh dingin Ruahpi a surter. Cun ruahpi a sur ringring tikah a haan ter deuh. Amaktuk! Asinan, ziangruangah Amah thang that/ biaknak hmun zumtu unau dang pawl hnenah tel ve loin phuahlam ka hawl theu:

* Khua a hlum/sa tuk...

* Khua a siktuk...

* Ruahpi a sur ruangah...

* Ka dam/nuam deuh lo ih...

* Rickshow fare ka nei lo...

* Cumi ih Sermon a sau tuk.

* Thuthan/thlacam a sau tuk...

* Khawm a nuam lo tuk...

* Mi thleidan an nei tuk ih...

*Upa pawl in in veh dah lo.

* Pastor pawl in in veh dah lo.

Ka nun in Pathian a thang- that duh ngaingai a si ahcun atlun ih ka tarlangmi pawl in Amah thangthat ih Biakinn feh in kham thei lo ding tih hi ka hmufiang...      Unau nang teh?

 * * * 

Mi Beidong Pawl ih Pathian

By: Rev. Dr. Khaw Lian Uk

I Samuel 2: 8 

“Mi nauta pawl leivut lak ihsin a khaisaang ih,

Mi tlasam pawl vutcam lak ihsin a cawisaang a si”.

Kan Bawipa Jesuh cu mi beidong pawl ih Pathian a si. Lei daan ih thum-awknak  ding nei ve lomi le duhsaktu nei  lomi pawl hrangah kan rualpi thabik a si. Mi ziangvek te kan si khal le Jesuh cun kan zawn in ruat ih in seherh ringring a si. Mi dang cu nang le kei  tel lo in an um thei na’n  Jesuh cu nang  le kei  tel lo in a ngam thei lo a si. A tawntaibik, a tlinglobik nang le kei  seherh ringringtu Pathian a si. Kan Bawipa Jesuh hmin cu thangthat in um seh!

Mibeidong kum hleihnih thiput nu:

Lk 8:43-44

Leitlun siibawi thiam pawl hnenah a neih mi hmuahhmuah cem theh in a zoh-aw (zingbawl) na in zohman in an damter thei lo. Lei daan ah ruahsan ding nei nawn lo beidong in a um lai ah zumnak in Bawipa Jesuh puan zimte a va tham  ih damnak a hmu saal a si. Kan Pathian hmin thangthat in um seh !

Leitlun ah mah le mah that-awtu pawl hi a tam sawn cu nun beidong pawl an si. Hlawhtlin lo ruangah, mai’ duhmi thawn co-aw lo ruangah,  dam lo ruang ah, lei-ba sam thei lo ruangah le nungtlak ih ruah-awk nawn lo ruangah mi tampi cun an nunnak an cemter a si.

Ca siartu nang khal ziangruangah maw beidonnak nei in na um pang asile tulaifang ih na tonmi thil harsa hi Jesuh ke hram ah thum awla Amah in a thabik in rem a ruat ding a si. Mathai 11:28 sungah. “Thilrit a phurmi le zonzaih a tuartu pawl, Ka hnenah ra uh, colh- damnak ka lo pe ding” tiah a ti.

Kan dunglam kum rei nawn ah Tamu khuapi ah Kawl fala le tlangval duh-awzet  te cu  zinglam 9:00 hrawngah an nun beidong tuk ruangah hri in an awk aw that. Ngaihthiam theih lo dingmi sualnak kan rak tuah pang” ti in ca fate an ngan ta. Kan Bawipa Jesuh in ngaihthiam theih lo misual a nei lo, zumlo sual ti lo cu.

Pathian hmai ih sual kan tuahmi a poi zia hmu aw suak ih thinlungtak ih ngaih thiam kan dil a si ahcun kan sualnak hmuahhmuah in ngaithiam a si. 1John 1:7. “Pathian hnenah kan sualnak kan phuan ahcun zumtlak le a dingmi a si ruangah kan sualnak in ngaidam ding ih kan mawh- nak hmuahhmuah a thiang faiter ding.” Ziang thu hman ah beidong lo in kan Bawipa Jesuh lawng rinsan in caan hmang cio uhsi! Ca siartu nan zaten Pathian in thlua- suah lo pe hngai hram seh!

* * * 

Harhdamnak

By: Dr. Run Bik

Milai kan si sung ah harhdam kan duh thluh. Ziang tluk ih milian le hminthang khalin damnak an neih lo cun an nun a nuam cuang lo. Damnak hi tampi cu mahte ti a theih lo na’n tampi cu mah ih um daan thiam ih ralrin cun midam kan si ding a si.

Mahte ti thei ding pawl ah hrekkhat pawl cu:

(1) Tidai in tam a tul: Milai taksa hi tidai 75% lai i tuahmi a si. Curuangah tidai kan in a tul ringring. Midam hrang khalah tidai in tam a tul nasa. Tidai in ih thatnak pawl cu: kan vun kan taksa a ti mawi. Zingpit ih tidai inn tam hin kan daikal a titha thei. Tidai in hin kaileng  le taksa sung hmun dang lungto um a kham thei. Tidai in tam hin thisen sang neih a kham. Zun-thlum nei duh lo hrangah le zunthlum nei zo hrang khalah tidai in tam a tul.

(2) Exercise: Milai harhdamnak ahhin ke ih feh le taksa cangter ih exercise lak a tul nasa. Mithiam pawl ti-nak ahcun nikhat ah minute 40 tal ke ih feh (Walking) a tul an ti. USA ah an President pawl hi kutke cangvaihnak (exercise) hrang ni khat ah KM 12 lai an tlan theu. Annih na nana cun kilkhawitu (body guard) ralkap 4 lai in an tlannak ah an tlanpi ih an kil theu.

(3) Ei in ral in a tul:  Harhdam ding ahcun ei in raalrin a tul ngaingai. Rawl tthing tuk tivek hi pumpi hrangah a tih nungzet. Arsa tla hi a tthingtuk tla cu tur ah a cang thei ti kan thei thluh ko ding. Sa hi kan ei tam thei lemlo ih, a ei tam thei hrang khalah ei ciamco hi a ttha cuang lo. Thlairah le thlai hnah ei tam a tul.

(4)Khiang thawng zar a ttha: Kan dunglam kum 30 lai khiangthawng ka hmang ringring ih khawsik/khurh nat (malaria) ka thei nawn lo. 1978 hrawng hi Mizoram, Mat-phai khua ih hmuan-duum ka tuahlai ahcun malaria in ka na nasa. Curuangah Delhi ih kan um ruangah thosilen a tul lo kan ti lo ding.

(5)Siizung feh thiam a tul:   Delhi ahcun raal-tlan (refugee) pawl hrang ahcun DDU hi a lak ih hmuh-awk theinak hmunpi bik a si. Asinan annih hi acozah siizung a si vekin mi an zoh tha ciamco lo. Naute besia hrangah tla cun tih a nung ngaingai. Cuti cingin mi tampi hrangah siizung thabik a si thotho ding. Private siizung pawl hi an thazet na’n sum an duh tuk ih ralrin a tul. Loh theih lo lawngah feh ding a si. 

* * * 

MIFIM PAWL IH AAN-KAA

Siar awla na thei ding. 

Hmu awla na fim ding. 

Mifim in mi thil ti sualnak ah khal 

zir ding an hmu. 

Mi aa cu mifim tong a ngai le tla 

a fim thei cuang lo.

Mifim nih cu 

mi aa tong ngai in tla a fim sinsin.

Nunau pawl cu

nunau vekin an um le an mawi bik ko.        

Leilung parah

Nunau phunhnih lawng an um:

Mipa tha pektu le tha laaktu.    

          

Na hrangih hnatuantu mi 12 le 

na hnenih hna ttuantu mi pa 2 an bangaw. 

     

 Na thok le thok lo hnakin 

na theh le theh lo ti a thupi sawn.  

Tong tam tuktu cu

hnattuantu tha an si dah lo.  

Paisa ah ka buai lo.

Mangbangza si lawng ka duh.

Lawrkhawmtu: Baw Boih (Canada)

* * *

SUNGHNO KA NU IH THUCAH

By: Pi Hrang Tin Sung

A ralai dingmi kum 20 hrawng ahcun,

Atui’ na khukthii, seen-rual pawl thawn,

ton saal caan a um tikah,

Cu mi cu an khua ah rinsantlak le

nei nung in a larzet zo.

Cu mi cu zaangfah a um, 

A re-thei in a harsa tuk... 

ti in rel saal caan nan nei leh ding.

Cuih tikcu le caan ahcun ...

Anih cu, cu mi hmun ah, 

cuvek siin zohthimtlak mi ti theih dingin,

Tui’ thokin, 

Zirnak in maw, tuannak in maw,

Teirial suah in tan na lak ding

ka lo ngen...

Hram:  DBCF 10 kimnak Magazine  

* * *

TONGKAM CU HUHAM CAHNAK A SI.

By: Rev. San No Thuan (Ph.D zirlai)

James 3:4,5: 

Asilole tangphawlawng khi ruathnik uh: a tumzetmi a siih a cak zetmi thli in a fehter; asinan a uktu ngaingai cu a fate zetmi lawng-hernak a siih, cumi hmangin lawng mawngtu in

a duhnak ah a fehter.

Kaa sungih lei khal hi cumi bangtuk 

a si; a fate na in thuhla tum zetzet in a porh thei. Thing le hrampi ziangtluk tupi kau a si khal le meici fate in 

a ur kaang thluh theu khi ruathnik uh.

Zumtu u le nau pawl atu vekin CCYI (Chin Christian Youth International) ih hohanak ah thusim ka co ngah ve ih ka lungawi zet. Ca siartu nan zatein, Khrih hmin in nan kut ka lo kai. Tuihsun ih ka lo ruah duhmi cu, minung ih tongkam kan nun thlatu khal a si thei bangin, kan nun tung dingtu khal a si thei ve. Satan nehnak nun thawn, a saannak hmun ih kan feh sin theinak ding hrangah ziangti in kan tong ding timi lo ruah ka duh.

Minung hi kan tongkam parah Pathian thluasuah a pe a si. Ziangahtile, kan tongmi cu kan sunglam ih kan lungput daan le Pathian kan zum daan ih rah khal a si. Curuangah, tongkam hi huham cahnak neitu a si.

Curuangah Baibal in, minung ih lei(tongue) cu kan nunnak kha suk le so lam ah a herter ih a fehter thei theitu a si tiah a ti. Ziangvek thawn a tahthim tile, “Lawng le Meisa” thawn a tahthiam. “Lawng” tumpi khi a suk le a so ih a herter rerotu cu, a dunglam ih lawng hertu (hudder, Burmese pet) fate khi a si. Meisa fate khal khi a kang ahcun, tupi khal a kangter theh thei.

Curuangah, thluasuah a dongmi tongkam kan tong suak theinak dingah, na harsatnak a tumzia kha tong nawn hlah. Cuhnakin, na Pathian ziangtluk a tum timi kha tong thok sawn aw. 

David le Goliath (1 Sam 17:43ff) ih thu kan zoh tik khal ah, Goliath in David kha a hro ciamco. Tum le a tumzet ih tih ding zazet a si. A hro daan tla cu, “David, tuisun ni ah na sa vate ka pe ding.” A zawm tai zet. Tuisun ah, kan harsatnak le kan buainak pawl khal in cuvek thotho in, nang cu to men aw. Hivek thil tha le hnatuan tha pawl hi nang in na ngah thei lo ding tiah, hi vek hnatuan pawl cu a tumtuk ih na ti thei lo ding tiah Satan in in ti theu.

Pathian ih thluasuah a pekmi pawl in hivek ih titu an neih tikah, ziangtin an sawn. David hi Pathian thluasuah a pek zetmi a si. Daivid in, “Goliath, nang in na ralnam le na cahnak na rinsan. Asinan, kei ka rinsanmi cu a nungmi Pathian a si. Tui sun rori ah, na taksa hi vate pawl ka pe ding” tiah a ti ve. Goliath ih tumnak, cahnak le awka hromi ih ciahneh a duh lo. Cuhnak in, Pathian ih thilti theinak le cahnak huham kha a thinlung sungah a ciahneh ter. Goliath hnak in Pathian a tum sawn ti a thei ringring.

Nang le kei teh, kan thinlung sungah Pathian rinsan in, kan ke rori in, kan tuah thei ding, “ka dam ding, hmailam ah tih lo in ka nor ding” tiah kan ti ngam maw?

Baibal in na lei(tongue) ih na tongkam cu na nunnak pi a suk lam le so lam ih mawngtu a si tiah a ti. Curuangah, na nunnak hi thlengh na duh ahcun, thanaunak tongka (negative words) pawl tong nawn hlah. Na tuah dingmi le na tuarmi harsatnak hnakin a tum sawn mi Pathian kha rinsan in, nehnak tongkam pawl tong sawn aw. Ral thazet in, Satan cu Jesuh ih nehzomi a sinak phuang uhsi. Cuih tlun ah, Pathian cu kan lam ih tang ringringtu, a hmunmi a duhdawtnak thawn in duhdawt ringirng (Ps. 100:5) tu a si zia khal zum uh si. 

A hleice in, kan hrang ih thabik remruat ringringtu (Rom 8:28) a sinak khal hngilh lo in, Khrih thawng in nehtu na sinak kha tong in, nunpi ringring aw.

* * *

Soisel ih na um lonak dingah Mi dang va soisel hlah

By: Salai Star

Delhi raaltlan pawl lakah soisel-awknak hi a tam tuk. Mi dang ih thu rel hi nuam kan ti zawng a si ruangah maw? Mi pakhat ih thil ti/tuah mi parah lungawipi, thapek le lawm lam si loin ziang si a ti sual/palh mi a um ti lawng hi kan bawh-aw ciam mam. Mino pawl in mahhnak ih u pawl ih thil tuahmi parah kan soisel, Upa deuh pawl in Mino pawl ih thiltuah mi parah tha pek lam si loin soisel le famkim lonak kan hawl. Kawhhran pakhat le pakhat kan soisel aw, hnam khat le hnamkhat kan soisel aw. Venghnen kan soisel aw. Unau kan soisel aw. Midang ih thuhla kan rel duh. Ahleice in Khawhhran pakhat le pakhat, Fellowship pakhat le pakhat soisel-awk hi a tam.

Unau... mi dang soiseltu maw, mi dang ih soisel mi kan si. Soiseltu kan si ahcun mah le mah hi cekfel awta sehla. Ziang- ruangah mi dang ka soisel? Mai mitsung ih hnawm tumpi hlonta loin midang ih mithnawm fate hmutu kan si pang maw? Soiseltu kan si sung poh cu kan soisel mi nu/pa hnakin kan niam, san kan tlai lo, kan fim lo tinak a si. 

Zumtu mi piangthar le mifim/fel pangai pakhat in mi a va soisel dah kel lo. Cuhnak in an hrangah thla an camsak ih an sambaunak pawl hrang ti theitawk in a bawm. A zaang a fak ih a tulsam mi pawl a cang theitawk in a tuah sak. Kan ni teh ziang kan bang?

Mi dang ih soisel mi kan si ahcun Bawipa hnenah sualsir in thlacam sehla. Bawipa hmai ah ti sual/palhmi kan nei pang tla a si thei. Cule a lo soiseltu pawl hrangah thlacam sak aw. 

Soiseltu kan si pang ahcun kan soisel mi nu/pa, kawhhran, felloship hnakin kan niam, san kan tlai lo sawn tinak a si. Curuangah Baibal sungih a sim vekin... Soisel ih kan um lonak dingah Mi dang kan va soisel ciam mam lo pei uh! Pathian ih Biakinn a simi kan taksa ruangpi hi thianghlimten kan ret sawn pei uh. Cutik lawngah kan ram a dam dingih Pathian tla a lung a awi ding.

* ** 

7th November 2010 Burma Election boruak thlirlawk nak

  By.. William Sui

A ra thleng cing dingmi Burma ram Election thu politician mifim pawl ih thlirdan zumdan cu a tanglam vekin a si:-

1. Democracy a duhtu Kawl party hrekkhat le Tainyinta party pawl cak thei lo dingin SPDC in 1990 kum 

        hril-awklai ih NLD harsatnak an rak pek vekin an tuah lala zo a si.

 2. tMurf;zuf party le opn party (ralkap pawl ih hmanrua party 2) cu SPDC ralkap cozah thawn an duhdaan 

       a bang-aw mi (democracy huatu lole Ralkap uknak duhtu veve) an si, curuangah SPDC in a bawm nasa. 

       Asinan 1990 Election result vekin mipi in an duhnak diktak an vote kha an hmang lo thei a si.

3. wdkif;&if;om; party pawl cun anmah miphun party ihsin a dingmi MP cuhtu pawl lawng vote pek an tum 

        cio ti thu theih a si.

4. SPDC ih milai veve, cianhphuinh leh Tahsahngiah party pa2 karlak ah dodal/cuh-awknak a um nasa zo ti 

         a si. An rem-aw lo, napin a sual aw lehtu ding an si.

5. NLD hotu pawl in Election ah vote pek duh lo dingin mipi hnenah si-zung-zi an tuah rero, State le 

       Division tinah khual an tlawng thok zo. Election rule ah vote pek duh lo khal a theih timi kha an tansan ve.

6. MP mesandahne zaten 1163 a um. Cianhphuenh party in MP cuhtu 1163 an nei, Tahsahngiah in 1100 

        an nei, Ethnic pawlin MP cuhtu ding 980, an nei ti a si.

7. Tahsahngiah le Cianhphuenh hi a do/cu awtu dingbik an siih, Tlangpar mi party pawl ih ngiarnak khal an 

        tong nasa ding ti a si.

8. Rangoon division ih mipi pawl cun, me kan thlak lo ding an ti tih thu a larzet zo ti a si. Ramkulh huap ih 

       um NLD a rak duhtu mipi pawl  khalin Vote pek tum lo tampi an um ti thuhla a tamzet zo ti a si.

9. Cianhphuenh party pawl in Tahsahngiah party ruangah kan rampi a buai thluh curuangah mipi in 

      Tahsahngiah pawl me an pek duh lonak dingih tuah a tul an ti. Tahsahngiah pawl khalin politics lam ih 

      experience nei lo mi pawl cu hril tlak an si lo ti ih, an dodal aw rero.

10. 2010 Burma Election cu, ziang thawn a bang aw ding tile, wrestling player, John Cena, Randy Orton, le 

        Undertaker mi 3 in WWE champion an cuh-awk tum vek kha a si. Tahsahngiah party, Cianhphuenh leh 

         Boycoott tum ih mipi a sizung rerotu NLD party hite 3 ih championship ding a si ding.

11. SPDC in a tumtah vekin ralkap pawl ih tlinter an duhmi party in nehnak an co ngah pang asile Tlangpar 

       mi pawl ih kan duhbik mi, mah miphun  mahte uk-awk theinak Federal state ngah ding, kan lungthlitum 

       beiseinak meifar eng cu a mit thim lawlaw thlang ti tluk a si ding.

12. Kawlram kulhpi mipi ih beisei mi Democracy beiseinak meifar eng khal a mit thimnak Election a si ding 

       ruangah Kawlram mipi cun nasazet in thu an ruat cio ding a si. Kannih khal napin thu kan ruat cio a tul a 

        si, tlangpar mi pawl….. 

13. Election ah me kan pek a si ahcun kan duh lozet mi ralkap uknak hngetkhoh sinsin seh, ka lung a kim ve 

        ko a titu kan si tinak a si ding. Ziangah maw? Kan hriltlin dingmi MP kha ralkap cozah in a duhtawk in 

        caw hnar hridirh vekin a sawr leh ding mi an si ti mi kha kan theihthiam ding a thupituk mi a si. 

Curuangah himi hril-awknak hrangah Pathian hnenah napi in thlacamnak thawn tan kan lak a tul a si. 

* * * 

Vol.(1) Issue(8) ih BAIBAL Answer

1 .: Bu 39

2. : Bu 27

3. : Bu 66

4. : Bung 929

5. : Bung 260

6. : Bung 1189

7. : Cang 33,214

8. : Cang 7,959

9. : Cang 41,173

Home Crusade: 

August thla sungah kan DBCF Pastor Rev. Si Nei Piang in Pu Hram Lian Bik innsang ah siseh, Hastsal veng Biakinn ah siseh, Paul Lal Siam Lian (JAP) veng ah siseh Pathian thusimnak le zirhnak a nei ih tluangten a theh suak thei. Pathian in run hmang sinsin hram seh.

Ramleng ihsin Sum lut: 

Kan Pastor hlun Rev. Dr. Khaw Lian Uk (USA) inn saang hnen ihsin English Service hrangah Rs. 1,000/- siseh, Salai Za Zung (Canada) in Rs. 2500/- DBCF hrangah an kuata si. Kan lungawi. Pathian in thluasuah pe hngai hram seh.

August thla sung sumlut:

August thla sung Pathian hnen ihsin kan donmi thlua suah hmuifu zate: 1/10 - Rs. 71,474/-, * Mission hrangah RS. 7,300/-* Thawhlawm - Rs. 1,870/-. Kan lung- awizet. Petu zate parah Pathian in thluasuah lo pe hngai hram seh.

Ram leng feh:

Pa David le Nu Thawng Kim innsang  (USA, Austin) September 13 ah siserh, Nu Lal Rem Mawi (USA, Indianapoli) September 15, ah siseh an pok ih an umnak ding hmun le ram ah tluangten an thleng thei zo a si. Umnak ciar ih Amah riantu tha an si theinak dingah thlacamnak thawn kan bawm cio pei. 

Dam lo thlacam sak ding:

Kan DBCF Pastor Rev. Sui Nei Piang ih innsang nu Nu Ma Biak (Suul lam dam lo, Lok Nayak Hospital), Lal Rin Hnem le Nu Lal Nun Zir (Suul lam dam lo, DDU), Bawi San Lian (Hastsal Nursing Home), Ma Thawng te nau suakpek (Taksa eng, Dada Dev Hospital) pawl hrang siseh, kan kawhhran member sungin siseh Kawhhran leng lamin siseh Sii zung ah dam lo le innsang ah tulai nat khuasik nat le nat sia a phunphun tuar in kan um cio ruangah dam lo pawl zate hrang thlacam saknak kan nei cio pei.

Member thar:

August thlasung Pathian in member thar in pekmi mipum 14 an kim a si. Pathian in an tuah an thamnak ah siseh, DBCF hi an hrang thluasuah ngahnak, Pathian thawn naih sinsinnak le lungawinak a can theinak dingah thluasuah malza sawm hngai hram seh.

Nauthar:

August thla sung Pathian ih pekmi fanau rilrah Pastor ih apsak mi pa(3) an kim a si. Pathian in dam cahnak le thinlung, taksa, thlarau dam in kaihruai vivo hram seh. 

Sunday School Zirhtu thar:

Kan nauhak zirhtu hrekkhat Tlawngkai in Delhi khaw lengah an suak ruangah an ai-awhtu dingin Salai Lal Biak Cuan le Mai Tawk Nei Thiang te cu E.C pawl ih lungkimnak vekin lak luh an si zo. Pathian in nauhak pawl zirhthiamnak thluasuah pe hngai hram seh. 

Nubu Excurssion:

Nubu hohanak in September 2, 2010 ah Delhi Khawsung Lotus temple, India Gate ah le Parleaman House, Rajeev Gandhi house pawl ah kan feh. Children Park ah kan Pastor Rev. Sui Nei Piang in Pathian thu thawn forhfialnak a neih theh hnu ah a rasuaktu zate hmin theihter-awknak tla kan tuah. Pathian lam hruai- nak thawngin kan hlunghlai zet. A rasuaktu zate 40 lai kan kim. In ra telpitu Deacon upa pawl siseh, Sunday School Zirhtu Saya/ma pawl siseh, Mino hruaitu pawl siseh, nan zate parah kan lungawi.

Pulpit Pangpar:

Zozo khal Lungawi thusimnak ah maw, hngilh lonak ah maw, Suah Ni lom lungawinak ah maw, tvk... Pulpil Pang Par hrangah pek a theih ringring.

Rawl-ul Thlacam:

DBCF Nubu ih hohanak in Zarhte Ni tinten Rawl-ul thlacamnak cu DBCF Biakinnpi ah a um ringring a si. 

DBCFY Anniversary Day:

September 12, 2010 (Sunday) ah DBCF Youth Wing kum 13 kimnak Pathian hnen lungawi thusim Biak khawmnak kan nei ih cumi theh zaan lam ah   DBCF department tinkim ihsin E.C zate hmunkhatte ah pawlkomnak kan nei saal

Mino Choir: 

Zarhtin Tlawng -kai ni li le ni nga, Biakinnpi ah Mino pawl Choir zirnak a um ringring. Rickshow fare le Refreshmen bupi in an tum ringring. Zo poh khal Pathian sunlawinak hrangah tel thei kan zuam cio pei.

DBCFY,  2011 Calender: 

2011 hrang Youth Department in Calender thazet kan tuah ih a leitu zate parah kan lungawizet. A lei hrih lo nan um a si ahcun sut hlam a theih ringring. Hmai(6) a siih Nitin siar ding Baibal Caang tete seseh, Important Day pawl tla kimcangten kan telh. A man cu Rs.50/- lawng a si.

Sunday School Crusade:

 DBCF Nubu ih hohanak in Nauhak Crusade a um ding. Kan fanau pawl Biakinn ah run thlah cio uhsi!

Speaker: * Rev. Sui Nei Piang Pu Hram Lian Bik... ‘Rundamnak le Nun daan Mawi’ 

Nithla: October 18-22... Caan : 2:30 - 4:30 PM