DBCF MEIFAR CAZUAL
June 27, 2010
Keimah cu Siangpahrang Bawipa ih Sabitti petu ka si (Neh:11)
By: Rev. Sui Nei Piang.Cuih hnu Pathian hnenah thla a cam ih ninghang riahsia lungngai rawl-hngei in ni ziang mawzat caan a hmang. Hi tikcu ah Nehamiah hi Siangpahrang Sabitti petu a si, amah hi Mino cakvakzet biaknaklam ih mi hmang-awzet, mit-men mawi, mi virvat tha le Pathian thawn kom-aw ringring mi-law, mirin-um, mi nel-umtak, hi san ih Siangpahrang ih mi rin-tlak tlangval note pakhat a si.
Sikhalsehla a tongkam le a thlacamnak zoh rero ahhin an pupa an hnam le a cipi sualnak ih tel ve rori vekin a rel aw. “Na parih tha lo tak ih kan um ih, na siahhlawh Mosia hnen ih na pekmi na daan pawl cu kan thlun lo ruangah na parah kan sual a si” ti’n Pathian a bia. An ram tlusia rem tha saltu ding khalah amah mawhphurh tumbik si in a thei aw ih a hruaitu le a khawkhangtu bik khalah a tang vivo. Nehamiah cu tangdorzet in Pathian hmai ah a phah-niam aw ih an hnam remtha saal dingin a tuah-aw ih, zaan ah a thil ti dingmi hnatuan pawl cu zohman ih theih loin Jerusalem ah a feh ih mi ihthah lai zaandai ah a thil tuah ding a zohfel thluh hnu ah a miphun pawl a kokhawm ih “Feh thlang uh law, tuan thlang uh law, tuanthlang uhsi! riahsia ih kan um lonak dingin Jerusalem kulh cu kan din thlang pei” a ti mai a si. Nanmah in kulh din uh a ti lo. Cun “ti-awter takin keimah ka din mai ding” a ti aw fawn lo “A ci le kuang pawl thawn lungrualzet in riahsia ih kan um nawn lonak dingah kulh siatmi cu kan dintha saal pei” a ti a si.
A tongkam cu a va mawi lawmmam ve ti uh law!!! A hranpa aw duh lo ih a miphun pawl si vekvek kha si a tum vivo ngam a si. A sialam thlir loin a mi pawl lakih tel duh vivotu a si. A thu rawn vek le a sawmnak vekin Isreal mi pawl cun a cii an miphun rem-that saal ding cun hna an tuan thok vivo ih Pathian an tih ruangah lo ram khal a mai’ hlawknak dingin pakhat hman lei mi a nei lo. Amai’ bul hrang ih sum khawl mi khal a nei lo, mipi pawl in a zar an to durdo mai a si. Curuangah raaltha tak le huaisen takin hna cu a tuan vivo ih ti bahlah tumtu pawl zohman hlawhtling an um lo. Bum an tum khal len Pathian in a bawm ih an bum thei dah lo. Thah an tum theu nan Nehamiah cu Pathian in a hum ringring. Rin um tak le thahnem ngaitak in hna cu an tuan khawm vualvo ih hna harsatak cu an theh ta riai. Sangka kiltu le hlasaktu pawl a ruat fel thluh ih saangka on tik-cu le khar tik-cu khal mai tik-cu caan te ih thatak ih kilhim dingah ziangkim a ruat fel thluh. A raal pawl relsiatnak vekin Lal tuan a tum maw, tum lo? A unaupa Hnani le a dang Hananiah Pathian tihmi cu Jerusalem ih hotu dingah a ruat. Kei cu Siangpahrang Sabitti petu ka si (Neh. 1:11) a ti.
Hiti zawngin kan zoh saal pei, a miphun pawl sualnak cu Nehemiah in amai’ sualnak vek rori in a ruat ve ih a la hrang aw duh lo Pathian a zoh ih amah le mah a hmu aw, “Bawipa Pathian kei cu na hrangih pe aw siang lotu Siangpahrang Artekzaksis ih duhzawng ih um theumi santlai lo tak ka si, ka rak sualtuk ih na duh zawngin ka nung lo tuihsun ah ka thei-aw suak a si. Na hmai ah zianghman ka si lo, nang-ai in Artakzaksis hril sawntu ka rak si. Sihmansehla ka sir-awknak mithli hi i cohlan sak dingih na hnen ih sualsir ih kir saal duh pawl ngaidam theutu Pathian na si kha, na thutiam theu vekin ka sualnak ngaidam dingin le in um pi vivo dingin ka lo dil a si.”
Zokhal hmuhsuam dah lo, dodal khal tum dah lo, mai’ hrang hlawknak lawng hawl mai lo, hnam le miphun rem tha ding ih a nun pe ngamtu Nehemiah vek ram hruaitu kan ram le miphun in kan tul a si.
THLACAM MI PAWL HMUH DAAN
Lawrkhawmtu... Pu Kap Sang
Kawhhran a nung lonak le a dam lonak san cu an thlacam a mal ruangah a si. Thlacam kan zaangzelnak san cu thildang kan ngaipoimawh ruangah a si.
Pathian lom hlawh pek-awknak umsun cu mah le mah phatsan-awk ih a hnen ih pum pek-awk hi a si. ..
Porh-awknak le do-awknak hmuahhmuah kan thenfai hlanhlo cu kan rongbawlnak zianghman Pathian in mal a sawm thei dah lo. .
Thlacam awn celcelnak hmun ah sual in hna a tuan thei lo.
Kan thlacam a hlawhtling theinak dingah kan nun kilkhawi (Pumhlum) hi Pathian lak ah a on-awk thluh a tul a si. -Nun Pumhlum in thlacam ding.
Leitlun thil ngainat hi thuthangtha simnak hmelhma a si.(dawntu a si) * Kan buainak hmuahhmuah ih a hramthoknak bik cu thlacam kan tlaksam ruangah a si.
Thlacam ngai poimawh lo mi cu a nung lo ih Baibal siar dah lo mi pawl an hriam dah kel lo.
Mai’ hrang lawng thlacam hi thlacam hlawhtling/ umzia nei a si bik kher lo.
Pathian hnen ih thil mak kan hmu duh taktak a si ahcun kan caan neihmi hi thlacamnak ah kan hmang theh ding.
Thlacam mi cu Pathian in a ngaihsak cuang ce.
HAPPY FATHER’S
DAYBy. Dr. Run Bik
Kan dunglam kum 100, Washington State (USA) ah William Smart timi a rak um ih a nupi in a thihsan. Fanau 6 a nei ih, nupi dang nei nawn loin a fale cu thate’n a cawm suak. A fa le sung ihsin Sonora Smart Dodd cu a kum 16 lai ih Mothers’ Day a hmannak Ni ihsin a thinlung sungah a Pa parah a lungawinak langter duhnak nei. Curuangah a Pa cawimawi duh ah 1910 ahkhan Father's Day tuah daan ding a rak tawlrel ciamco. June thla hi a Pai’ suah thla a si. A hnakum June thla ah an umnak khua ah Pa Ni (Father's Day) an run tuah suak. Citicun Pa Ni (Father’s Day) cu hman vivo asinan a mikip ih theih le hman a si hrih lo. Faher’s Day a rung hmin thannak cu 1923 ih President William Cooldeg ih Father's Day a run tuah sak ihsin a si. America ram pumpi ih an run hman cu 1966 a President L.B. Johnson in June thla zarhthumnak Sunday ih hman ding a ti ri in a si.
Tui kum Father’s Day kan DBCF khal in June 20, 2010 ahkhan sunglawizet le hlunghlaizet in kan hmang. Rev. Hau Khaw Thawng in thuthangtha a sim ih Dr. Run Bik in Father’s Day a thohkehnak thuhla fiangzet in a simfiang hnu ah Khawm ih rapoktu pa le pawl hmuahhmuah Bupi in laksawng peknak a neih ih hlei ah DBCF Nubu ih hohanak in kum upa Pa le pawl laksawng peknak tla kan nei. Sunday School in siseh, JAP Veng mino pawl in siseh, DBCF Zaipawl in siseh Pa sun lawinak hla mawi an sak ih lung a zuur ngaingai. Minpi khawmtu zate tla kan tha a tho ngaingai.
HAPPY BIRTHDAY DAW AUNG SAN SUU KYI
(Suukyi kum 65 kim lawmnak)
New Delhi ahcun himi Ni hi Rajya Sabha member Sarad Johsi ih MP inn Chanakya Puri veng ah tuah a si. Hih zaan ah Delhi Burmese Communisty ihsin Tin Tin Aung le Dr. Tin Swe te ih hohanak in mi 80 lai an tel thei. India ih mi hminthang pawl lakah Journalist larzet Kuldip Nayar tla a tel. Thusimtu pawl in Suu Kyi an upat thu an sim thluh ih, hmaikum ih a Birthday ahcun Suukyi ih a zalen thlang an rin thu an sim. Thlacam sak cio uhsi!
Prospect Burma Co-ordinator thar
New Delhi, Janakpuri, Asalatpur veng, Prospect Burma Tlawng ih Coordinator thar cu June 5, 2010 (Sat) Ni ah Mirang 3 in Interview an tuah. Interview dingih an hrilmi cu mi 5 an si. Cumi mi 5 sung ihsin kan DBCF Chairman Dr. Run Bik cu a thiamnak le experience pawl thawn an zoh tikah a tling ruangah Prospect Burma ih Coordinator dingah thlangtlin a si.. DBCF in kan lungawipizet. Pathian in coordinator a tuannak ah hlawhtlinnak pe vivo hram seh.
Hi Tlawng ahhin Mirang le Computer a lak in zirh a si hlei ah nitin Rickshow Fare Rs.20/- an pek. Kawlram mi hmuahhmuah hrang ih zirnak thazet a si. Hih tlawngih kai duhtu pawl cu kum 16 ihsin tlun lam lawng a theih ih Interview a ongtu pawl lawng cohlang a si. Asinan ramleng feh ruangah le dam lonak ruangah a suak saal an um theu ih a kai duh ngaingai pawl cun a khattawk in suhhlam a theih ringring. Tlawngta hi mipum 60 lawng an cohlang. Hih Tlawng hi London ihsin run zoh mi a siih kan Daw Aung San Suu Kyi ih bomnak(Sponsor)ih phuanmi a si.
Donbosco ih zirnak
By: ... Ukte
Computer le English zirnak: Refugee zate hrangah Computer le English a lakin Don Bosco ah zir a theih. Thla(6) sung zir ding a si. Zir theh ah certificate(capi) an pek. Zir duh hrang passport size photo(2) le UN card photo copy a tul. UN card neilopawl hrang khal appointment slip te pawl thawn kai a theih thotho.
Phun 10 le 12 Kai duh hrang? UN Card ngahzopawl hrangah phun 10 le 12 Don Bosco zungah zir a theih. Nitin hnatuanpawl hrang khalah a zir theih thotho. Kum 18 kim hrihlo zir duh pawl hrangah UN card ngah tengteng a tul lo. Phun 12 zir theh hnu ah DU ah zir thei ding ah tawlrelsak an si ding.
Pumcawmnak (I.G.A): Income Generation Activity hi refugee hrangih tuah a si. Thuamhnaw thit, thilphiar etc. pawl zir a theih. UN ngahzopawl hrangah thla khat Rs-3000-4000 lenglo hlawh theihnak hmun a si. Pitar le putar hrang nazi pakhat 15 tohmun in an hlawh thei.
Bawmnak Malte (Small Business Grant): Refugee rawldawr ong duh, beauty parlor, sumpai lakluhnak a phunphun hrangah Rs-15,000 tiang Don Bosco in a bawm thei. Asinan UN Card nei tengteng a tul. Dilnak thehluh hnu ah an lo check dingih cutin bawmtlak na si le silo an zoh fel hnu ah thuhla an lo sim thei ding. Kumkhat sungah mi(30) vial bawm theih a si.
Hnatuan hawlsaktu pawl (Placement): Hnatuan hawlsaktu mi 7 lai an um. Hnatuan neilopawl hrang hawlsaktu ding an si. Cun, tuihkum ihsin an hnatuan hawlsakmi pawl hrang Rs-1000/- thawn an bawm bet. Cun Bank debit(ATM) card khal an tuah sak. Hnatuan-nak pu le thawn buainak ton caan khalah theihter ding an si. 2009 hnu ih card ngah pawl lawng bawm theih an si.
Zirnak lam hrang bawmtu (Vocational Sponsorship): Computer lam a phunphun zir duh, electronic lam pawl le English tong hmun dangih zir duh pawl hrangah Rs-10,000 thawn bawm theih a si. Bawmtlak an si le si lo, interview tuah an si ding. An lungkim hnu ah ngah le ngahlo theihter an silai ding. Computer zir duh cun basic tal thiam ding a si.
Mino punkhawmnak (Youth Club): Vengtin ah Youth Club an ret. Jeevan Park ih youth Club ‘Awiti,’ Sitapuri youth Club ‘Vakok,’ Hastal youth club ‘Chok Hlei Par,’ Budhela youth Club ‘Sun Shine,’ C-1 ‘Tai Chon’ pawl an si. Anmah le veng ah Room fate sangin Mirang zirnak an nei ih thlatin puai tete an tuah bet.
English Zir a tul
by... Dr. Run Bik Taithio
Leitlun ih milian bik a si theu mi Bill Gate (tu ahcun milian pahnihnak a si) cu kan dung April thla ah India ih UP le Bihar State ah a ra tlawng i, Mino pawl hnen ih a sim-uar mi cu "Learn Englsih, Learn Computer" ti a si. “Mirang ca zir uh.” “Mirang tong zir uh” ti hi kei khal in Delhi ih ka um kum 8 sung ih ka sim bikmi a si theu.
Tulai ah third country a simi USA, Australia, Canada na feh le Englsih na thiam a tul tuk. Englsih hmang lo mi Norway, Denmark le Sweden na feh khal le an ram mi pawl thawi Englsih ih thu an rel ding ruangah English na thiam a tul nasa thotho. Hrekkhat in, “Kan va thlen le English in zirh thotho ding ih, Delhi ih sum cem le bangthlak ih rak zir a tul lo an ti. Hihi a dik lo mi a si.
Delhi kan umlai ih English zirta lo ruangih a poi zia malte ka lo hlawm ta ding: kan upa hlun pakhat Delhi a umlai ah English a thiam duh ruangah kum 62 a si zo nan Prospect Burma ah a kai. Tu cu Canada Vancover ah a thleng zo. A umnak ih English zirnak cu minute 30 hrawng hla i feh a tul lai ruangah a zir thei nawn lo. Delhi a umlai ih thiamzet in a zirta lo cu a sir-aw ngaingai. Cun Atlanta ih a feh zotu DBCF Secretary hlunpakhat tla Delhi ih a umlai ah English thaten a zir ta lo, thlathum lai lawng a zirman ih duhthusam in a thiam man lo. Atu a umnak ah Englsih duhthu sam in a zir thei lo. Curuangah a tlun ih Third Country ah duhthusam in kan zir leh ding ti cu a cang thei lo a si cu! Australia ahcun nazi 500 sung, cucu thla5 sunglai a cozah in an zirh an ti. Asinan hnatuan zang a tul thawn thla (5) zir man an tam lo ding. Delhi ih caan tampi na neihlai ih na rak zir ahcun Australia ih thla 5 na zir tulmi kha thla 3 lawng na zir dingih, thla 2 in sum na khawl kha A$1000 rak si sehla India Rs. cun 33,000 lai a si ta mai. Curuangah Delhi na umlai ih Don Bosco, Prospect Burma ih rak kai hi a hlawk tuk. Englsih thiam hi third country na feh khal le na tul, India ih na umlai khal le na tul, Burma ih na kir ding hmanah na tul, Burma kir cu na tum lemlo nan.
THEIH HARBIK
Hram VA
01. Thil hmuah hmuah lak ah ziang a hlun bik? (The oldest) -
Pathian,ziangah ti le a um ring ring zo ruang ah.
02. Ziang a mawi bik? (The most beautiful)
-Lei le van a mawi bik, Pathian tuah mi a si ruang ah.
03. Ziang a nasa, a ro pi bik? (The greatest)
Van, tlo-lak kaw-hawmpi(space) a kau bik, a tum bik.
Sersiammi hmuahhmuah a sungih an um theh ruangah.
04. Ziang thu a tunghmun bik? (The most constant)
- Ruahsan nak, beisei nak(hope), ziang hmuah hmuah hloh theh hnu hman ah milai
thinlung ah a um lai thotho.
05. Ziang a tha bik? (The best) -Thatnak(virtue)a tha bik,
-Thatnak tel loin zianghman a tha lo.
06. Ziang a rang, a feh cak bik? (The quickest)
- Ruahnak(thought)a cak bik, minute pakhat hlanah Lei le van deng tiang a thleng man.
07. Ziang tha a cak bik? (The strongest)
- Tulnak (necessary) a cak bik. Tihnung za hmuah hmuah hman a pahtlang thei.
08. Ziang thu a olbik? (The easiest)
- Khawruahnak, thuruahnak(advice)a ol bik.
09. Ziang a har bik? (The most difficult)
-Mah le mah theih-awk ding a har bik. (To know thyself)
Thuthan
May thla sung sumlut:
Tu thla May thlasung ih Pathian hnen ihsin kan donmi thluasuah sung ihsin thenhra thenkhat Rs. 6,2695/- le Mission Rs. 39,840/- kan ngah a si. Petu zate parah Pathian in van thluasuah, lei thluasuah pe hngai hram seh. “Pathian hrangah Siangzet in nung awla na Lian ding.”
Mission thutiam:
June 13, 2010 (Nipi Ni) ah tukum ih a veihnihnak Mission Thutiam kan tuah saal ih azaten tiamkam kan ngahzat cu Rs.26,980/- a kim thei ih tiamkamtu zate parah lungawinak simcawk lo kan nei. A veikhatnak ih tiamkamtu pawl tla pekzang thei dingin nan tuah nan thamnak ah Pathian in thluasuah lo pe hram seh.
A lakin natnak zohter:
May 27, 2010 ah Dr. Sa Sa ih hohanak in Delhi ih um Laimi thenkhat hrang natnak a lak ih zohternak DBCF Biakinn ah tluangten tuah a si. May thla 19 ah DBCF Biakinn ah amah Dr. Sa Sa in Pathian thu thawn forhfialnak tla a nei. Amah hi kan Laimi lakih Cathiam pakhat a siih Laimi hrang ti theitawk ih hnatuan tumtu a si. Thlaza kan camsak cio pei.
May thla sung Member thar ap mi:
DBCF May thlasung ih member thar Pathian ih in pekmi zate Mipum 33 an si. Pathian sunlawinak hrang ih hmantlak mi le DBCF hrangah pumpe theitu an si theinak dingah thlaza kan camsak cio pei.
Kan riahsiatpi:
Nu Thawng Kim (Nubu E.C) ih hringtu nu Pi No Lawng Thluai (Kum -74) in June 10, 2010 (Thurs) ni ah Pumpi Cancer natnak ruangah Tithim Khua, Kalay Township ah a taansan ih DBCF in kan riahsiatpizet. Taantak mi Nu Thawng Kim le sungkhat unau zater parah Pathian in thlangamnak thawn umpi hram seh.
Nubu Rawl-Ul Thlacam:
DBCF Nubu pawl ih hohanak in Biakinn pi ah Zarhte Ni ti’n zing 9:00 ihsin thokin Rawl-Ul Thlacam neih ringring a si.
Mino Thuthan
Key Board zirnak tluangten thehsuak:
DBCF Mino Key-board zirnak cu June 14-18 (Mon-Fri) tluangten kan thehsuak thei. A zirtu mipum 8 an kim thei. A zirhtu Salai Piangte parah lungawinak tampi kan nei. Pathian in thluasuah pe sin hram seh.
Mino Thlacam:
June 26, 2010 (Sat) Biakinn pi ah Mino thlacam tlangnak kan nei thei ih Mino tampi an ra suak thei ruangah lungawinak tampi kan nei. Thlacam taima mi Mino kan si theinak dingah Pathian in thluasuah pe cio hram seh.
Lucky Draw:
Mino fund hrang Lucky Draw kan tuahmi tha in petu member zate le a leitu zate parah kan lungawizet.
Mino Lungawi bawm:
Mino lungawi bawm a thawh khawmtu member zate parah kan lungawizet. Pathian in thluasuah tampi lo pe hngai hram seh.
Church Choir:
Pathian lamhruainak thawng in Church Choir zirtu mipum kan karh vivo. Mipum 50-60 lai kan kim thei ringring. Bupi in sumpai tampi cem in Choir hrang in tawlrelsak mi hi theithiam in Zai Pawl khalin Pathian sunlawinak hrangah tiin tan kan la sinsin pei uh. Church Choir a zir hrih lo Mino tampi kan umlai ih Pathian sunlawinak hrangah kan Aw le Zai hman kan tum ve cio pei. Choir zir caan hi zarhtin Tlawngkai Nili zaan(Thurs) le Ninga (Fri) zaan naza 8:00 ah a si.
DBCF Meifar
Neitu
DBCF (Y)
Editor:
Salai Thian Za Thang
Bawmtu:
Salai Ukte
Advisors:
Dr. Run Bik
Steven Ral Kap Tluang
Pehtlaihnak
91-9910293229
E-Mail
Blog (website fate):
dbcfmeifar.blogspot.com
