DBCF MEIFAR

(Vol.1) Issue (4) April, 2010


Editor Cafung:

Fapa : “Ka Pa mizaan ka mang ah Vuirang parah ka to so khaw.”
Pa :“Si maw ka fapa… aw a va poi em … zaanmumang ih Vui- raang par to cu
thihnak silole vansiatnak tong thei an ti so khaw…
Fapa : Asinan maw ka pa ka tihtuk ih zamrangten ka tum saal so khaw…
Pa : Ai ze! cu kel… Vui-raang par to ti cu vansiatnak tong lo ahcun vanthatnak
tumpi tong thei tla an ti si… na tum saal cu a va poi ve.
Fapa : cule maw ka pa… zamrangten ka tum nan…ka fehnak lamzin a sia tuk ih Vui-
rang parah cu ka kai saal lala so khaw…
Fapa : Takngai a… fapa cuvek mang man thei tla ka neih cu!... lukheuh phah in…
“culen… na tum saal lala maw? ? ?”

Tumtahnak fumfe neih a cu !

Mi in Third Country kan thlenhlan ah Tlawngkai a tha… timen ruangih tumtahnak nei lemlo nan Tlawng ah Admission tuah ih a can kim ngaingai le kai paih saal lo…
Mi in “Third Country ah computer thiam pawl cu paisa tampi an ngah” ti men ruang ih mai’ tithei zawng si lo nan hei zir ve…. Zianghman thiamsuakmi le um cuca si lo…

Kan fimnak, kan thiamnak le kan can tha hi Pathian sunlawinak hrangah hmang ding kan si lai ah tumtahnak fumfe nei loin Lai Mino tampi mithu cawng men in kan um rero hi cu a poi nasa. Pathian in mi zaangzel le tumtahnak fumfe nei lo pawl cu ziangtik hmanah thluasuah a pek dah lo.

“Zaan mumang ih Vuirang a totu na si pang maw?”
Na si pang ahcun cutivek mumang man lo dingin atu ihsin it-that nawn hlah… tho thlang aw.

Culole manglettu pa ih sal ah na cang pang ding.


* * *

ZIANG ZAWNAH HAA ZUMTU KAN ZANGZEL THEU BIK ?

Pa Pathian tongkam le a thinlung langnak Bible hi siar vakvak uh si law.zumtu pawl. Jesuhkhrih Thu thangtha ruangih tuar tu an um ruangah kan Minung pi pawl cun mit ih hmuh theih lo thlarau sia { Sal } ih tang pawl in za lennak an hmuh theinak dingah le rel siatnak le dodal nak lakkhal ah kan nihcu Jesuhkhrih ih { Titlii }kan si.ih a siahhlawh kan si ti in Pathian thu ah rin um ten a thusuak mi parah an thinlung le an ruahnak an rak hngat aw in an rak thum aw sawn theu a si.Unau.

Kan Bible sung kan zo a si le thu ngai thlak ih Pathian Cabu siar pawl kan hmuh thei mi pawl.zo thim tlak le cawntlak nun an rak neih zia kan hmu thei a si.
{1 }Danpeksalnak-{ 31;10-13 }-sungah Siar uh ti kan hmu.
{2 }2 siangpahrang-{ 23;2 }-sungah Siangpahrang Josiah in a siar.
{ 3 } Nehemiah- { 8;3 }-sungah Ezra in a siar.timi kan hmu thei.
{ 4 } Nehemiah- {13;1 }-sungah.Mipi hnenah an siar.timi kan hmu.
{ 5 } ISaiah- { 34;16 }-sungah Bawipai Ca-uk siar hnik uh. timi kan hmu.
{ 6 } Jeremiah- { 36;6 }-sungah Ring zetin siar aw.ti kan hmu.
{ 7 } Jeremiah- { 36;21 }sungah Jahudi in a siar.timi mi kan hmu.
{ 8 } Daniel - { 5; 17 }suangah Daniel in a siar.timi thu kan hmu.
{ 9 } Mathai- { 21;41 }suangah Jesuh"in an hnenah,Ca Thianghlim-ih a timi
hi nan siar dah lo maw?timi kan hmu thei.
{ 10 } Marka-{ 12; 26 }suangah Moses Cabu sungih hrambur a kangmi thu kha nan siar dah lo maw?timi thu kan hmu thei.
{ 11 } Apostes-{ 8; 28 }sungah- Isaiah in Cabu a siar.timi thu kan hmu thei.
{ 12 } Thuphuan- { 1;3 }suangah Hi Cabu a siar le Profet thusimmi a theitu le hi Cabu sungih aummi a thluntu pawl cu mi lungawi an si.

ziangahtile hi thu pawl a kimnak tikcu a nai zo.timi thu kan hmu thei sal a si.Unau.nang le kei um menmen le to menmen ding kan si nawn lo riai a si.Na sungah le ka sungah cak hiarnak kan nei zo cio maw?kan sungih cak hiar nak nei thei hrih lo kan si pang lai le na nunnak ah le ka nunnak ah kan sungah ThlaruaThianghlim huham cahnak in pakhat ciar kan nunnak ah in rawhvam cio in in Tuaithar sal cio hram seh law.Pa pathian ih hmantlak a hmanrua a hriamhrei dingah kan nunnak in tathriam cio hram seh.Amen.Curuangah nang le kei Pathian ih hmantlak kan si ding cun kan nunnak a mai hrangih Amah ih in Rawhvam ih in tuaithar ih in tathriam rori ta kan tul a si. by: Pu. David Lian.

Bupi thuthan

Ramleng in fehsantu pawl:

Tuthla sungah kan rinsanzet mi kan DBCF ih Deacon upa Jerimiah Pa Tuk (Secretary) 13th April 2010, Pu Hrang Hu (Mission Treasurer), Pi Ngun Thlia (Nu, Vice President) 11th 2010, Tv Za Zung (Sunday School Saya), Fl Par Dai lo , Fl Ciang Kim, Denial Lal Ram Thar , pawlhin CANADA ah in fehsan a si. Pathian lamhruainak thawngin tluangten an thleng ti thu kan thei. An tuah, an tuanmi tinkim ah Pathian in Thluasuahnak pek cio hram seh.

Bupi Sum Audit:

5-7 Apr 2010 ah Bupi thla (4)voikhat sum Audit nak neih a siih Departmen tin sum zohfel a si. January - April, 2010 DBCF ih lutmi sung ihsin:
* Thenhra thenkhat (1/10) : Rs. 185,859/-
* Offering (Thawhhlawm) : Rs. 16,395/- . A cipciar in Tresurrer hnenah zohfel a theih a si. A thawhtu member zate parah Pathian in thluasuah lo pe vivo hram seh.

Crusade:

Kan DBCF Chairman Dr,Run Bik in Biakiin pi ah zarhkhat sung crusade a neih theh hnu ah 15-11 April, 2010 zarhkhat sung Vikaspuri, BCRC Hall ah a peh saal ih Pathian lamhruainak thawng in tluangten thehsuak a si. Mipi in kan hlawkpi nasa. Pathian in thluasuah pe in hmang vivo hramseh.

Nubu Thuthan

Nubu E.C Thar:

Nubu E.C sung ihsin ramdang in fehsantu tla an um ruangah an ai-awhtu ding pawl lak saalnak le dinhmun thlengaw tete a um ruangah a thar in kan tarlang saal: ...

* Nu Hrang Tin Sung... (President)
* Nu Hram Tial... (Vice President)
* Nu Ro Din Pui... (Secretary)
* Mai Lal Hnem Par... (Asst Secretary)
* Nu Sui Nei Ting... (Treasurer)
* Nu Thawng Nei Kim...... (Finance Sec.)
* Mai Kual Kip Nei... (Auditor)
* Nu Olivia Rin Pui... (Auditor)
* Nu Tha Nghel... (Member)
* Nu Lal Nun Kim... (Member)
* Nu Van Lal Hnem... (Member)
* Nu Siang Sin Man... (Member)
* Nu Sial Tin Par... (Member)

Mother’s Day:

May 9, 2010(Sunday) ah Nubu pawl ih hohanak in Nu Ni (Mother’s Day) cu special Program thawn hman a si ding. Nu sunloih Ni a siih Nu a neilai pawl in a riahsiat ding na tuah sual pangmi a um pang maw ahcun a can um lai ah sual sir in ngaithiam dil aw.

Nubu Speacial Programme:

Thla (2)veikhat Speacial Programme neihtheu mi cu April ni 25 (Saturday) zaan ah hman a si ding. Member kan zaten khawm dingih sawm kan si.

Nubu Rawl-Ul Thlacam:

DBCF Nubu pawl ih hohanak in Biakinn pi ah Zarhte Ni ti’n zing 9:00 ah Rawl-Ul Thlacam neih ringring a si. Hih thlacamnak ah ra pan tengteng aw. Zumtu pawl ih kan thlarau cahnak a si. Na tulmi hmuahhmuah kan Pa Pathian hnenah lukun in diltlang uhsi!

Pulpit Pangpar:

Zo zo khal Birthday lawmnak, Pathian hnen lungawi thusim, Hngilhlo nak, etc…,Biak-Inn Pi Sunday Zingkhawm hrangah pangpar hlu a theih ringring. Ahlu duhtu pawl in Nubu President le Secretary hnenah theihter ding asi. Cule Nubu cangvaihnak a si mi fangthuam, lawm Bawm, Pulpit pangpar a thawhtu/apetu le tlawmngaizet ih a khongtu nanzate parah Nubu hmingin lungawi thu kan lo sim a si. Pathian in nantuah, nantuannak parah thluasuahnak lo pe vivo hram seh.

Mino Thuthan

Thlahnak: :

DBCF Mino President Pa Gabrial Moe Moe Kyaw innsang cu Pathian ih rem a ti si le 20 April, 2010 ni ah Austrilia ah feh ding an si. Tluangte‘n an fehsuak theinak dingah Mino EC pawl in 17 April, 2010 (Sat) ah Thlahnak le thlacamsaknak kan nei.

MINO Rawl-Ul Thlacam:

Mino pawl ih thla(2) voikhat Rawl-Ul Thlacam a neih theu mi cu 17th April, 2010(Saturday) Biakinnpi ah ah hlawhtling zetin neih saal a si. Mino kan thahnem in Thazaang kan ngah ngaingai. Himi zaan ah Mino Special zaan khawm hman cih a siih in ra telpitu nanzate parah Mino hmin in lungawi thu kan sim. Pathian in thluasuah lo pe hram seh.

Nauthar:

Pa Josept le Nu Par Tha te innsang ihsin fapa te Jacob April . 2010 ( ) le Pa Lal Tha Kima le Nu Lal Tawn Cang te innsang ihsin fapa Hniang Kawn, Pathian in thluasuah rilrah a pek fingfing ih kan lungawipi. Pathian in hringtu nu le fanau pawl damcak ih an um vivo theinak ding thlaza kan cam sak cio pei.

Choir zirnak:

Zarhtin Tlawngkai Nili zaan(Thur) le Ninga zaan (Fri) tin Hlarem (choir) zirnak a um ringring. Mino pawl kan no lai ahhin kan aw le zai hi Pathian sunlawinak hrangah kan hmang cio pei. Choir zirnak ih a ra pok ringirngtu vengtin ih mino zate le a zirhtu pawl parah Kawhhran pi in lungawinak tampi kan nei.

***

Kawlram Thuthang

Yangon, Kandawkyi ih bomb Puak thu cakuat:

U Le Nau Pawl,

Tuni 15,4,2010 tlailam dar 3:00pm hrawng ah khan Yangon Kandawgyi ah bomb(Bom) a puak ih mi tam zet an thi ih tam nawn in hliamhma an tuar ruangah An Titawih puai(Tingyin) puai hmang rero lai cu tlunlam thunei tu pawl in an cawlhter hruak hnu ah sunzawm nawn lo in an bang lan ta.Hi milai thi le hliamhma tuar pawl hi ziangzat ciah ti le zo pawl ih kut in bom a puak ti cu theih asi hrih lo.

Hi kandawgyi sehvel ah hin stage(dawnsang) tum tak tak panga vuakvel in a um ih tukum Ti Tawk Puai Yangon ah cun minung tambiknak hmun a si. Keitla cu kan inn hmai ih sizung mawtaw ih hliamhma phur pawl ka rak hmuhngah ih ka thin a nuam lo zet.

Thaisun puai tuah sunzawm ding le ding lo khal theihfiang a si hrih lo tin thunei tu pawl hnen in thu dawngsawng a si.Thunei tu pawl in siangkhal hai seh la a veivak tu pawl teh in veivah ngam teh a si ke maw ti cu thaisun ah a fiang ko ding. By..Thangte (Ygn)

* * *

Kawlram in online Bank tuah

YANGON, (Xinhua via COMTEX) – Kawlram acozah ih neihmi Myanmar Economic Bank (MEB) pawl cun April 2, ihsin thokin a milai pawl hnenah Smart Card hmangih olsam te ih an paisa an thleng thei lohli theinak dingah tiin computer hmangin (online) a tuah sak.

Myanmar Post le Telecommunication pawl thawn tuantlang in Yangon le Mandalay ih MEB peng pawl cun ADSL, IP Star pawl hmangin sun zan ziangtik lai khalah hman theih in tuah a si ding tiin Bank pawl cun an phuang.

Kawlram hin bank pakhat le pakhat pehtlaihnak (Banking Network) khal cu bank paruk pawl hnenah olai te ih ramsung ih bulpak le a rampi neihmi Bank pawl an pehtlaih awk theinak dingah tiin a tuahsak zo tiin Bankers Association pawl cun an sim.

Yoma bank, Myanmar Citizens Bank, Tun Foundation Bank, Myanmar Foreign Trade Bank, Myawaddy Bank and Myanmar Industrial Development Bank pawl hi a ramsung ih neihmi an siih MIT le Global Net kuthnuai ah an um. Kawlram ah acozah ih neihmi Bank pali 4 le bulpak mimal ih neihmi 15 an um ih Central Bank hnuai ah an zaten an um thluh.

Hram : CT

* * *

TUMTAHNAK

Milai kan siih thanso kanduh ahcun mai’ tawk ih tumtahnak rak neih a tul ding. Tumtahnak kan timi hi mi hrek hrang ahcun tlawng ih phun(10) on tla a si ding, mi hrek hrang ahcun B.A on maw, B.Th on maw tla a si. Mi hrek hrang lala ahcun mai’ theihtawk ih sum hawl tla a si ding. A then hrang ahcun kan nu le pa an thih hlanah cawm ding ih tuan le anmai’ kiang umter tla a si men ding. Ziang a si khal le mitha zaraan cun thiltha a tumtah dingih, misual um tha duh lo pawl cun thil thalo khal an tum thei men. Thiltha kan tumtah mi pawl hi a ol lomi an si thluh men ding. Asinan thiltha an si ih tlunah thil tul an si fawn ding, cuihrangah thiltha kan tumtah mi hlawhtling ding ahcun taimaknak (Hard work), daan thlunnak(Discipline) le pekawknak(Sacrifies) pawl a tul.

Taimaknak tel lo cun ziang hlawh tlinnak hman a um lo ding. Taimaknak kan ti tikah hnatuan tamnak ti a si mai. Zianghna kan tuan khal le beidonglo te ih thate’n kan tuan ringring ih kantuan vivo ahcun hna tampi kan tuan dingih kan hlawhtling tinak a si mai. Tlawngta kan si khal le cazoh tam na nana cu camipuai(exam) kan ong ding tinak a si ding. Sumdawng dawrkai pa in a dawr nikhat ah nazi(14) sunglai a on cun thil a zuar tam ding.

Kei ka umnak Nihal Vihar, Nangloi, N.Delhi dawrte pakhat cu pafa in an hngak ih zing 6:00 AM to zaan 10:00 PM tiang dawr an ong. Zaan an inn ah nazi(6) sunglawng an it man. An dawr sawn ah sun ih an sawng-aw.

Discipline a umlo cun ziangtluk ih taima khal an hlawhtling cuanglo ding. Dawr kil taima maw, hnatuan taima kan si khal ah zu kan in phah ih kan rin-um lo cun kan tluang cuang lo ding. Tlawngkai lai khal ah tlawng Daan thlun le ti dingmi ti a poimawh. Cule pekawknak hi a thupizet, lehhnu nunnomnak ding khalah kan rak pekawk a tul. Ram le miphun le kohhran hrang ih hnatuannak khalah pekawknak a tul.

Atawpnak ah tumtahnak kan neihmi khal hi kan hrilthiam a tul ding. Kanmai’ hrang, kawhhran hrang, miphun le ram hrangah a thahnem ding maw, a cangthei ding maw tikhal hril thiam a tul nasa.

by... Dr. Run Bik (DBCF Chairman)

THLALANG
( Mirror )

Thlalang kan ti tikah nitin kan zoh-awknak ih kan hmanmi Thlalang si loin kan sunglam Thlalang kan sim duhnak a si sawn. Zozo khal nikhat veikhat tal cu Thlalang ah kan zoh aw theu ding tin ka zum. A then le phei cu veikhat lawng hman a si lo ding. Cuvek thotho in zumtu pawl nitin kan thinlung Thlalang ah zoh-aw ringring ding kan si.

Atu kan hman ciomi Thlalang ih kan zoh-awk tikah kan lenglam tisa ( Lu, Mit, Hnar, Kaa, Kan ruangpum, Kan thawmhnaw) lawng kan hmu thei. Sunglam Thlalang ih kan zoh-awk tik ahcun kan tlinlonak, kan khawruah sual, midang parih thinlung thalo kan putmi, mah le mah duhtawk awnak, mi siatnak rel nuam kan ti mi etc... pawl fiangten kan hmu aw thei ding. Asinan kan sunglam Thlalang ih zoh-awk hna kan thiam lo leh kan Thlalang a baal a si ahcun fiangten kan hmusuak aw thei dah lo ding. Zumtu pawl cun kan thinlung Thlalang ti fainak ding cun kan zumnak hi a si. Kan zumnak hi a thianghlim in a felfai maw?

Kan zumnak a thianghlim in a felfai a si ahcun kan Thinlung Thlalang a fai dingih kanmah le kanmah fiangzet ih kan hmuh-awk theinak a si hlei ah mi dangin an ra zoh awk tik khalah fiangte’n an hmu awk theinak ah a cang ding. Mah le mah fiangte’n kan hmuh-awk tik ahcun leitlun thilri le midang nun ah buai ding a um nawn lo. Mi nun ih kan buaipi ding umsun cu Thlacam saknak lawng hi a si.

Hnahhlun Hnuai

Hnahhlun hnuai ih
Hnahhlun hnah ro pawl cu
Thlizil in a hraanhlo theh nan
Na neh hlun cu...kan neh hlun cu.....

Hramhring tlun ah lunghring in
Na kha tlangtluan in na thahri hring pawl cu
Ruat in, ngai in, cau in ka zau.

AhNge hlafang
"hman a theih lo mi thluak cun na thu a ruat "
a ti bangin
Na thu ta rori ka ruat
Cuti'n
Hnahhlun hnuai ah
Ni za liam in
Thla za a rak thim.

Zunphir(2010)

ASEAN hotu pawl tawngaw ding:

HANOI, Vietnam (AP) – Southeast Asian ram 10 pawl cun pursum leilawnnak lak thu le nikhua umtu dan thleng danglam ruangih harsatnak thu pawl rel khawmnak tlawngkai nili April 8, tui sun ah Hanoi ah an nei ding.

An thurel khawmnak ah Kawlram hrilawknak thu khal relnak an nei ding a zum um. Hruaitu hrek khat pawl cun Kawlram hrilawknak ti cawl hrih dingih NLD party pawl ih an duh mi cu pompi ih nawr ve dingin an duh thu an sim. A mahlawngte a tamsawn cun mipi vangtlang theih ih an dem ding cu an zum lemlo.

Indonesia le Philipppine cun Kawlram hin ASEAN hmin a ti sia tiin le Kawlram ih hrilawknak ding thianghlim lo zet ih antuah tum mi hi an lungkim lo pi thu an rel zo. Kawlram hi ASEAN ih sungtel pakhat a si ve. Human rights group Amnesty International pawl cun ASEAN ram hruaitu pawl hin Kawlram nasa zet ih soisel/dem dingin a ngen.